“Oltin to‘p”—2022. Son Hyon Min Osiyo vakillari orasida tarixdagi eng yuqori reytingni qayd etdi. Mane — Vea davridan keyingi eng yaxshi afrikalik

2022-yilgi “Oltin to‘p” sovriniga da’vogarlarning reytingi e’lon qilindi.

“Liverpul” sobiq hujumchisi, hozirda “Bavariya”da to‘p surayotgan Sadio Mane ushbu reytingda ikkinchi o‘rinda qayd etildi. Mane afrikalik futbolchilar orasida 1995-yildan keyingi eng yaxshi natijani qayd etdi. 1995-yilda liberiyalik Jorj Vea sovringa ega chiqqandi.

Senegallik futbolchi o‘tgan mavsumda “Liverpul” bilan Angliya Kubogi va Liga Kubogida zafar quchdi. Uning jamoasi Chempionlar Ligasi finaliga qadar yetib bordi, APLda esa ikkinchi o‘rinni qo‘lga kiritdi.

“Oltin to‘p” reytingida “Tottenhem” klubi va Janubiy Koreya terma jamoasi forvardi Son Hyon Min 11-pog‘onada qayd etildi. Bu Osiyo vakillari orasidagi eng yaxshi natija bo‘ldi. Hali hech qaysi osiyolik futbolchi “Oltin to‘p”ga da’vogarlar ro‘yxatida bu qadar yuqori o‘rinni egallamagandi.

“Oltin to‘p” sovrini Karim Benzemaga (“Real Madrid”) topshirildi, Gavi (“Barselona”) yilning eng yaxshi yosh futbolchisi deb topildi. Aleksiya Puteliyas (“Barselona”) eng yaxshi ayol futbolchi, Tibo Kurtua (“Real”) eng yaxshi darvozabon, “Manchester Siti” (Angliya) esa eng yaxshi klub nomiga loyiq ko‘rilgan.

Mavzuga doir:

• Karim Benzema 66 yil ichidagi eng yoshi katta “Oltin to‘p” sohibiga aylandi
• Ronaldu — 20, van Deyk — 16, Son esa 11-o‘rinda. “Oltin to‘p” sovriniga ovoz berishning dastlabki natijalari e’lon qilindi