«Олтин тўп»—2022. Сон Ҳён Мин Осиё вакиллари орасида тарихдаги энг юқори рейтингни қайд этди. Мане — Веа давридан кейинги энг яхши африкалик

2022 йилги «Олтин тўп» совринига даъвогарларнинг рейтинги эълон қилинди.

«Ливерпуль» собиқ ҳужумчиси, ҳозирда «Бавария»да тўп сураётган Садио Мане ушбу рейтингда иккинчи ўринда қайд этилди. Мане африкалик футболчилар орасида 1995 йилдан кейинги энг яхши натижани қайд этди. 1995 йилда либериялик Жорж Веа совринга эга чиққанди.

Сенегаллик футболчи ўтган мавсумда «Ливерпуль» билан Англия Кубоги ва Лига Кубогида зафар қучди. Унинг жамоаси Чемпионлар Лигаси финалига қадар етиб борди, АПЛда эса иккинчи ўринни қўлга киритди.

«Олтин тўп» рейтингида «Тоттенҳэм» клуби ва Жанубий Корея терма жамоаси форварди Сон Ҳён Мин 11-поғонада қайд этилди. Бу Осиё вакиллари орасидаги энг яхши натижа бўлди. Ҳали ҳеч қайси осиёлик футболчи «Олтин тўп»га даъвогарлар рўйхатида бу қадар юқори ўринни эгалламаганди.

«Олтин тўп» соврини Карим Бенземага («Реал Мадрид») топширилди, Гави («Барселона») йилнинг энг яхши ёш футболчиси деб топилди. Алексия Путелияс («Барселона») энг яхши аёл футболчи, Тибо Куртуа («Реал») энг яхши дарвозабон, «Манчестер Сити» (Англия) эса энг яхши клуб номига лойиқ кўрилган.

Мавзуга доир:

• Карим Бензема 66 йил ичидаги энг ёши катта «Олтин тўп» соҳибига айланди
• Роналду — 20, ван Дейк — 16, Сон эса 11-ўринда. «Олтин тўп» совринига овоз беришнинг дастлабки натижалари эълон қилинди