Rossiya prezidenti Vladimir Putin butun mamlakat bo‘ylab safarbarlikni yakunlash haqida hozircha qaror qabul qilgani yo‘q, deya ma’lum qildi davlat rahbari matbuot kotibi Dmitriy Peskov.
Jurnalistning Putin Moskva va Podmoskovyedan o‘rnak olgan holda butun mamlakat bo‘ylab qisman safarbarlikni tugatishni rejalashtiryaptimi, yo‘qmi mazmunidagi savoliga javoban shunday dedi: “Hozircha bunday qaror bo‘lgani yo‘q. Bilasizmi, Mudofaa vazirligi tomonidan har bitta hudud uchun safarbar etiluvchilar soni bo‘yicha ko‘rsatkichlar belgilangan. Va hududlar safarbarlik vazifalari bajarilganini ma’lum qilmoqda. Shu tariqa qisman safarbarlik jarayonining o‘zi bu vazifa amalga oshirilgan hududlarda to‘xtatilgan. Safarbarlikni yakunlash bo‘yicha prezident farmoniga kelsak, u hozircha yo‘q”.
Bundan tashqari, safarbarlik bo‘yicha yangi marralar belgilanishi, ya’ni safarbar qilinuvchilar soni oshirilishi ehtimoli haqidagi savolga javob berar ekan, Kreml vakili prezident farmonida gap aynan 300 ming kishi haqida borishi, belgilangan raqamning oshirilishi haqida “gap ham bo‘lishi mumkin emas”ligini aytdi.
Safarbarlik qachon e’lon qilingan edi?
21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi. Xizmat o‘tab bo‘lgan, harbiy-hisob mutaxassisligi va jangovar tajribaga ega bo‘lganlargina chaqiriladi. Talabalar va shoshilinch xizmat harbiy xizmatchilari safarbar etilmaydi, degan edi Shoygu.
Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.Oktabr o‘rtalarida esa Putin Rossiyada qisman safarbarlik doirasida allaqachon 220 mingdan ortiq odam harbiy xizmatga chaqirilgani, ikki hafta ichida tadbirlar yakunlanishi mumkinligini ma’lum qildi.
Safarbarlik bo‘yicha reja bajarib bo‘lingani haqida Rossiyaning bir qator hududlari, shu jumladan, Moskva, Pomoskovye, Qrim, Checheniston, Udmurtiya, Perm o‘lkasi, Yoqutiston, Mordoviya, Mariy El va boshqalar e’lon qilgan.
Izoh (0)