Ижтимоий тармоқларда Бухорода йўлларни кенгайтириш ва сохта туристик жойларга ўрин очиш учун эски бинолар вайрон қилинаётгани ҳақида хабарлар тарқалди. Вилоят Маданий мерос бошқармаси буни рад этди.
«Собиқ Шаҳристон бозори ҳудудида Фанлар академияси мутахассислари томонидан археологик тадқиқот ишлари олиб борилмоқда. Археологик қазишма ишлари олиб борилган ҳудуд сайёҳлар кўриши учун ойнали шиша тўсиқлар билан ўраб олинган. У ерда ҳеч қандай қурилиш ёки йўлларни кенгайтириш ишларини амалга ошириш режалаштирилмаган», — дейилади муносабатда.
Шунингдек, мазкур ҳудудда археологик парк ташкил этиш бўйича ишлар олиб борилаётгани билдирилган.
Бундан ташқари, Бухоро шаҳар, Ҳақиқат кўчасида жойлашган Мир Саид Камол мадрасасида ҳам Бухоро минтақавий реставрация маркази томонидан таъмирлаш-тиклаш ишлари олиб борилаётгани қайд этилган.
«Ҳозирда мадрасанинг таъмирталаб (авария) ҳолатга келиб қолган девори қайта тикланмоқда. У ерда ҳеч қандай қўшимча қурилиш ва йўлларни кенгайтириш ишларини олиб бориш режалаштирилмаган», — дейилади хабарда.
Изоҳ (0)