“Daryo” va uning ijtimoiy tarmoqlardagi sahifalarida Namangan shahridagi maktablardan birining o‘qituvchisi o‘quvchini ayovsiz kaltaklagani aks etgan video e’lon qilindi. “Daryo” muxbiri Azizbek Abduvaliyev voqea joyiga borib, vaziyatga aniqlik kiritishga urindi.
Mazkur voqea joriy yil 13-oktabr kuni Namangan shahrining Davlatobod tumanidagi 58-davlat ixtisoslashtirilgan umumta’lim maktabida ro‘y bergan. Maktabning 5-sinfida o‘qiydigan qizlar sinf rahbarlari bo‘lgan geografiya fani o‘qituvchisiga sinfdosh bola ustidan shikoyat qiladi. Pedagog bolaga tanbeh bergan payt oradan gap qochadi. Shundan so‘ng 27 yashar o‘qituvchi yigit hissiyotlari va qo‘liga erk beradi.
Bu o‘qituvchini ishga olganimizga rosa bir yil bo‘lgandi. Oldingi faoliyat olib borgan joylaridan yaxshi tavsiyalar berishgan, qolaversa, o‘zimizda psixolog bilan suhbatdan o‘tgan. Bu sinfni o‘quv yili boshida qabul qilib olgan va hozirgacha hammasi yaxshi ketayotgandi. Sinfdosh qizlar va bolaning o‘rtasidagi mojaroga aralashganidan so‘ng shunday xunuk holat yuz bergan. Kaltaklangan bolaning singlisi ham shu maktabda o‘qiydi. Ularning ota-onasidan o‘zim ham, o‘qituvchi yigit ham qayta-qayta kechirim so‘radik. Chunki o‘zimizning ham farzandlarimiz bor, bo‘lib o‘tgan voqeadan ota-ona qanchalik darajada ranjiganini juda yaxshi tushunamiz, — deydi maktab direktori Qobiljon Mirzaboyev.
Qayd etish joizki, 58-davlat ixtisoslashtirilgan umumta’lim maktabi Namangandagi eng nufuzli maktablardan biri sanaladi. O‘tgan o‘quv yilidagi maktablar reytingda mamlakat bo‘yicha 5-o‘rinni egallagan.
Maktabdagi o‘qituvchilarning 40 foizi oliy toifali pedagoglar, o‘quvchilar esa Kosonsoy, Uchqo‘rg‘on, Pop kabi chekka tumanlardan ham keladi. Bitiruvchilarning oliy ta’limga kirish qamrovi bo‘yicha ham viloyatda yuqori o‘rinlarni birini egallaydi.
Bo‘lib o‘tgan voqeadan o‘zim ham, maktab jamoasi ham shok holatida. Chunki o‘qituvchi hech qachon tajovuzkor kayfiyatda bo‘lmagan, o‘sha vaziyatda o‘zini boshqarolmagani uchun ming pushaymon. Biz o‘zimiz ham qayerda qanday xato o‘tganini qayta-qayta tahlil qilyapmiz. O‘sha kundan beri tinchimiz buzilgan, kimga nima deyishni bilmaymiz. Chunki yuz bergan holat pedagogning kasb etikasiga mutlaqo to‘g‘ri kelmaydi. O‘quvchi baribir o‘quvchi, bola baribir bola. Shunday nufuzli dargohga yarashmaydigan va maktab tarixida umuman kuzatilmagan hodisa yuz berdi. Bundan nihoyatda afsusdamiz, — deydi direktor.
Namangan shahar IIO FMB voyaga yetmaganlar va yoshlar bilan ishlash guruhi katta inspektori, podpolkovnik Gulida Obidovaning aytishicha, maktabda yuz bergan voqea yuzasidan murojaat kelib tushgan zahoti ta’lim muassasasiga kelib, o‘qituvchi va jabrdiyda bolaning ota-onasi bilan suhbatlashgan, vaziyatni o‘rgangan va muhokama yig‘ilishi o‘tkazgan. To‘plangan materiallar esa tergov guruhiga taqdim etilgan. Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Izoh (0)