Shavkat Mirziyoyev Turkiyaning Bartin provinsiyasidagi ko‘mir konida yuz bergan portlash oqibatida ko‘plab insonlar qurbon bo‘lgani munosabati bilan Rajab Toyyib Erdo‘g‘onga ta’ziya yo‘lladi. Bu haqda prezident matbuot kotibi xabar bermoqda.
Davlat rahbari vafot etganlarning oila a’zolari va yaqinlariga hamdardlik bildirib, jarohat olgan konchilar tez fursatda sog‘ayib ketishini tiladi.
Kondagi portlash
Turkiyaning Bartin viloyati Amasra tumanidagi ko‘mir konida yuz bergan portlash oqibatida qurbon bo‘lganlar soni 40 kishiga yetgan. So‘nggi ma’lumotlarni Turkiya ichki ishlar vaziri Sulaymon Soylu jamoatchilik bilan bo‘lishgan.
Avariya vaqtida konda bo‘lgan 110 kishining 58 nafari qutqarib olingan. Bir konchining taqdiri noma’lum bo‘lib qolmoqda. Soyluning aytishicha, qidiruv ishlari davom etmoqda. Amasra tumanidagi konlardan birida portlash 14-oktabr, juma kuni mahalliy vaqt bilan 18:15 atrofida yuz bergan.
Turkiya sog‘liqni saqlash vaziri Faxriddin Xoja avvalroq ma’lum qilganidek, 11 kishi kasalxonaga joylashtirilgan. Turkiya prezidenti Rajab Toyyib Erdo‘g‘on 15-oktabr, shanba kuniga belgilangan barcha tadbirlarni bekor qilib, tez orada voqea joyiga yetib borishini e’lon qilgan. Bartin viloyati prokuraturasi kondagi portlash yuzasidan jinoyat ishi ochgan.
Avvalroq kon portlashi oqibatida 28 kishi halok bo‘lgani haqida xabar berilgandi. Turkiya konlaridagi eng yirik portlashlardan biri 2014-yil mayida Manisa viloyatida sodir bo‘lgan, o‘shanda 270 dan ortiq odam halok bo‘lgandi.
2017-yilda esa Turkiyaning Shirnak viloyatidagi ko‘mir konida yuz bergan portlash oqibatida olti konchi halok bo‘lgan.
Izoh (0)