O‘zbekistonda kollej va texnikumlarga kirish imtihoni javoblari e’lon qilindi

Davlat test markazi tomonidan 3-7-oktabr kunlari 2022/2023-o‘quv yili uchun professional ta’lim muassasalari (kollej va texnikumlar)ga kirish test sinovlari o‘tkazilgandi. Markaz ma’lumotiga ko‘ra, 15-oktabr kuni mazkur test sinovining yakuniy tanlov natijalari e’lon qilindi.

Ta’kidlanishicha, talabgorlar tanlov natijalarini my.dtm.uz sayti orqali shaxsiy kabinetidan bilishlari mumkin. Shuningdek, test sinovlari natijasidan norozi bo‘lgan abituriyent yoki uning ota-onasi yoxud ularning o‘rnini bosuvchilar (vasiylar) ikki kun davomida professional ta’lim muassasasida tashkil etilgan apellyatsiya komissiyasiga yozma yoki elektron shaklda apellyatsiya shikoyatini berish huquqiga ega.

Bunda apellyatsiya shikoyati qabul qilingani to‘g‘risida abituriyentga xabarnoma beriladi. Shikoyatni bergan abituriyent xabarnomada belgilangan kunda o‘zining pasporti (tug‘ilganlik haqida guvohnoma) va abituriyent ruxsatnomasi bilan kelishi shart.

Shikoyatlar ikki ish kunida apellyatsiya komissiyasi tomonidan abituriyentning yozma javoblari asosida ko‘rib chiqiladi.