Беларусь Бош штаби Россия ҳарбийлари мамлакатга келишини эълон қилди

Россия-Беларусь минтақавий қўшинлари гуруҳининг асосини Беларусь ҳарбий хизматчилари, шунингдек, яқин кунларда мамлакат ҳудудига кела бошлайдиган Россиянинг алоҳида ҳарбий тузилмалари ташкил қилади, деди Беларусь раҳбари ўринбосари. У қўшинларнинг қўшма гуруҳланишини «соф мудофаа лойиҳаси» деб атади. Бу ҳақда «РБК» хабар берди.

«Ҳарбий хавфсизлик соҳасида тенгликни таъминлаш ва Беларусь Республикасида тинчликни сақлаш мақсадида ҳудудимизда қўшинларнинг минтақавий гуруҳини яратиш тўғрисида қарор қабул қилинди. У тинчлик даврида Беларусь Республикаси қуролли кучлари, шунингдек, Россия Федерациясининг алоҳида ҳарбий тузилмаларига асосланади», — деди Тумар.

У Беларусда Россия билан қўшма қўшинлар гуруҳининг жойлаштирилишини НАТО бир неча йиллардан буён мамлакат чегаралари яқинида ўз ҳарбий салоҳиятини ошираётгани билан изоҳлади. Унинг сўзларига кўра, Беларусь билан чегарадош ҳудудларда замонавий ҳужум қуролларига эга бўлинмалар шакллантирилмоқда, Польша ва Болтиқбўйи мамлакатларида ҳарбий инфратузилма яхшиланмоқда.

«Бу фактлар Беларусь Республикаси ва Иттифоқ давлатига ҳарбий хавфсизлик соҳасида таҳдид кучайиб бораётганидан далолат беради ва шошилинч чоралар кўришни талаб қилади», — деди Беларусь Бош штаб раҳбари ўринбосари.

10 октябрь куни Беларусь раҳбари Александр Лукашенко Россия президенти Владимир Путин билан қўшма минтақавий қўшинлар гуруҳини жойлаштириш бўйича келишувлар имзоланганини эълон қилган эди. У бундай қадам заруратини ҳозирги таҳдид даражаси билан боғлаган. Унинг сўзларига кўра, Минск «мингдан ортиқ» рус ҳарбийларини қабул қилишга тайёр. «Агар таҳдид даражаси ҳозирги даражага етса, биз Иттифоқдаги гуруҳлашдан фойдаланишни бошлаймиз», — деган Лукашенко.

Шу билан бирга, Лукашенконинг таъкидлашича, Минск «норасмий каналлар орқали» Украина томонидан Беларусга зарба бериш ҳақида огоҳлантириш олган.

Октябр ойи бошида Беларусь чегара хизмати раҳбари Анатолий Лаппо Украина чегарасидаги «босим» ҳақида гапирди. Унга кўра, Украина Қуролли кучлари чегара яқинидаги барча автомобиль ва темир йўл кўприкларини портлатган, шунингдек, барча чегара йўлларини миналаштирган. Шу билан бирга, Лукашенконинг айтишича, Киев Беларусь чегарасига 15 минггача аскар олиб келган.

Россия Украинага уруш очганидан буён Лукашенко бир неча бор Минск унда иштирок этишни режалаштирмаганлигини айтган, аммо кузда у буни амалга ошираётганини тан олди, лекин ҳарбийларини ҳеч қаерга юбормаётганини айтди.