Urush boshlangandan beri Rossiya 6 mingta texnikasini yo‘qotdi

Ukrainada urush boshlanganidan beri Rossiya armiyasi 6000 ta texnikani yo‘qotdi, o‘q-dorilar esa o‘rnini bosishi mumkin bo‘lmagan darajada sarflanmoqda, deb yozadi “Agenstvo Novosti”.

Hisobotda aytilishicha, Rossiya may oyidayoq dizel dvigatellari, vertolyot va samolyot dvigatellari hamda tanklar yetishmasligiga duch keldi. Bundan tashqari, Moskva boshqa davlatlardan mudofaa buyurtmalarini bajarishda muammolarga uchragan.

Rossiya harbiy sanoati sanksiyalar bilan cheklangan yuqori texnologiyali komponentlar va oddiyroq qismlarning yetishmasligidan qiynalmoqda. Shunday qilib, podshipniklar yetishmasligi tufayli tanklar, samolyotlar, suv osti kemalari va boshqa jihozlarni ishlab chiqarish va ta’mirlashda muammolar yuzaga keldi, deyiladi xabarda.

Oq uyning yuqori martabali mulozimining New York Times’ga aytishicha, Vashington qanday texnologiyalar Rossiya sanoati uchun “tanqis” bo‘lib qolishi mumkinligini aniqlashga harakat qilmoqda, ularning yo‘qligi zaxiralarni qayta tiklashga jiddiy ta’sir qiladi. AQSH moliya vaziri o‘rinbosari Uolli Adeyemoning qayd etishicha, Oq uy hozirda Rossiya oz sonli yetkazib beruvchilardan qurol-yarog‘ uchun qanday qismlarni olishi mumkinligini aniqlashga va ularning kirishini cheklashga harakat qilmoqda.

Xabarda, shuningdek, Rossiya “oligarxlar va front kompaniyalari tarmog‘i” yordamida G‘arbning tanqidiy texnologiyalarga qo‘ygan cheklovlarini chetlab o‘tishga uringani aytiladi.

Avvalroq The Wall Street Journal tahlilchilarga tayangan holda urush boshlanganidan beri Ukraina Rossiya armiyasidan ko‘ra G‘arb davlatlaridan kamroq og‘ir qurol olgani haqida xabar berilgan edi. Shu jumladan, Ukraina Qurolli kuchlari Rossiyaning 421 ta tankini, 445 ta piyoda askarlarini, 192 ta zirhli texnikasini va boshqa vositalarini qo‘lga kiritgan.