Rossiya Qrim ko‘prigini 2023-yilning iyuligacha qayta tiklashni rejalashtirmoqda

Rossiya portlash yuz bergan Qrim ko‘prigini 2023-yilning 1-iyuligacha ta’mirdan chiqarishni rejalashtirmoqda. Tegishli buyruq Rossiya hukumati tomonidan chiqarilgan, deb yozadi rossiyalik OAV 14-oktabr, juma kuni. “Ishlarni yakunlash uchun tuzilayotgan davlat shartnomalarining muddati 2023-yil 1-iyulgacha, deb belgilansin”, — deyiladi qarorda.

Ko‘prikni ta’mirlashda yagona pudratchi sifatida “Nijneangarsktransstroy” kompaniyasi tanlangan.

Qrim ko‘prigida 8-oktabr kuni tongda yuk mashinasi portlab ketdi. Portlash tufayli shu payt ko‘prikning temiryo‘l qismida harakatlanayotgan yuk poyezdining yonilg‘i ortilgan sisternalari yonib ketdi. Oqibatda 4 kishi halok bo‘ldi, shuningdek, ko‘prikning avtomobil yo‘li qismida uchta tayanch ustuni oraliqlari qulab tushdi.

Rossiya javob qaytarishga va’da berdi

Qrim ko‘prigidagi portlashdan keyin Rossiya Tergov qo‘mitasi terrorizm haqida ish ochdi, mamlakat prezidenti Vladimir Putin voqeada Ukraina maxsus xizmatlarini aybladi. “Shubhasiz, bu Rossiya Federatsiyasining o‘ta muhim fuqarolik infratuzilmasini vayron qilishga qaratilgan teraktdir, — dedi Putin. — Mualliflar, ijrochilar, buyurtmachilar — Ukraina maxsus xizmatlari”. Qrim ko‘prigidagi portlash va yong‘in qo‘poruvchilik va terrorchilik harakati hisoblanadi, uning ortida esa “kriminal Kiyev rejimi” turibdi, ularni “yo‘q qilish” kerak, dedi Rossiya sobiq prezidenti, Xavfsizlik kengashi raisi o‘rinbosari Dmitriy Medvedev.

“Rossiyaning ushbu jinoyatga javobi faqat terrorchilarni bevosita yo‘q qilish bo‘lishi mumkin. Butun dunyoda aynan shunday qilinadi. Rossiya fuqarolari aynan shuni kutmoqda”, — deya fikr bildirdi Medvedev.

Ukraina shaharlari bombardimon qilindi

10-oktabr kuni Rossiya Ukraina bo‘ylab ayovsiz raketa zarbalarini berdi. Ukraina shaharlariga 80 dan ortiq raketa tashlangan, ularning yarmi havo hujumidan mudofaa tizimlari tomonidan urib tushirilgan. Ukraina rasmiylarining xabar berishicha, Kiyevning o‘qqa tutilishi oqibatida kamida sakkiz nafar tinch aholi halok bo‘lgan.

Rossiya prezidenti Vladimir Putin Ukraina shaharlarining o‘qqa tutilishi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.