“Yagona umumrespublika protsessing markazi” (Uzcard) ustav kapitalidagi 75 foiz davlat ulushi xususiylashtirildi. Bu haqda Davlat aktivlarini boshqarish agentligi (DABA) xabar bermoqda.
Davlat tender komissiyasi tomonidan 20-avgust kuni Uzcard’dagi 75 foiz davlat ulushi mustaqil baholash tashkilotini jalb etib sotilishi to‘g‘risida qaror qabul qilingan edi.
Ta’kidlanishicha, DABA tomonidan jalb etilgan mustaqil baholovchi Real Excellent Valuation kompaniyasi Uzcard qiymatini baholagan. Xuddi shu qiymatda Uzcard’ning ustav kapitalidagi davlat ulushini sotib olish istagi bildirilgan.
Uzcard’ni 4 nafar ishtirokchilarga 25 foizdan baholangan qiymatda, jami 210,1 mlrd so‘mga sotish yuzasidan oldi-sotdi shartnomalari imzolangan.
Qayd etilishicha, mazkur shartnomalarga muvofiq joriy yil sentabr oyida DABAning xususiylashtirish jamg‘armasiga kelib tushgan ushbu mablag‘lar qonunchilikda belgilangan tartibda taqsimlangan.
Izoh (0)