Turistlar ijara narxlariga ta’sir ko‘rsatgan: O‘zbekistonda aholi tomonidan sezilgan inflyatsiya ma’lum qilindi

Markaziy bank sentabr oyida o‘tkazilgan so‘rov natijalariga ko‘ra, aholi tomonidan sezilgan inflyatsiya darajasini ma’lum qildi.

Unga ko‘ra, aholi tomonidan sezilgan inflyatsiya pasayuvchi dinamikani davom ettirib, 14,8 foizni tashkil etdi. 

Shu bilan birga, so‘rov ishtirokchilari orasida inflyatsiyani 8 foizdan past darajada his qilganlar ulushi iyun oyidan boshlab muntazam ravishda oshib bormoqda (18 foizdan 31 foizgacha). 

Aksincha, 20 foizdan yuqori oshganini his qilganlar ulushi sezilarli qisqardi (37 foizdan 24 foizgacha). 

Sentabr oyida ham avgust oyi kabi narxlari yuqori darajada oshgan deb go‘sht, sut, non, un, shakar va yog‘ mahsulotlari ko‘rsatilgan. 

Biroq, non, un, shakar, benzin va qurilish mollarining narxlari yuqori o‘sishini qayd etgan respondentlar ulushi o‘tgan oyga nisbatan kamaydi. 

Mamlakatga turistlar oqimi ko‘payishining ijara narxlariga ta’siri sentabr oyidagi aholi javoblarida aks etdi. 

Shuningdek, tashish va aloqa xizmatlari, savdo, ishlab chiqarish va qishloq xo‘jaligida faoliyat yuritayotgan so‘rov ishtirokchilari inflyatsiyani yuqoriroq darajada sezdi.

Mamlakat hududlari kesimida sezilgan inflyatsiyaning nisbatan yuqori ko‘rsatkichlari Buxoro, Namangan viloyatlari va Toshkent shahrida kuzatilgan bo‘lsa, nisbatan past ko‘rsatkichlar Navoiy, Andijon hamda Surxondaryo viloyatlarida qayd etildi.

Avvalroq O‘zbekistonda inflyatsiya 12,2 foizni tashkil etayotgani haqida xabar berilgan edi.