Sun’iy yo‘ldoshdan olingan so‘nggi suratlar Rossiya Norvegiya chegarasi yaqinida yadroviy qurolga ega 11 ta bombardimonchi samolyotlarini joylashtirganini ko‘rsatmoqda, deb yozadi “Agentstvo Novosti”. Harbiy ekspertlarning fikricha, Rossiya shu tariqa G‘arbga signal yubormoqda.
Norvegiyalik jurnalistlarning yozishicha, suratlar Planet Labs tomonidan 7-oktabr kuni ertalab olingan. Ularda Murmansk viloyatidagi Olenya aviabazasida yettita Tu-160 va to‘rtta Tu-95 tasvirga tushirilgan.
Ikki kundan keyin Tu-160 samolyotlaridan biri aerodromning uchish-qo‘nish yo‘lagida suratga olingan.
Manbada yozilishicha, Rossiya bombardimonchi samolyotlarining mavjudligi uzoq muddatli xarakterga ega. Odatda, bu harbiy samolyotlar Saratov viloyatidagi Engels aviabazasida joylashtirilardi. Sun’iy yo‘ldosh tasvirlari tahlili shuni ko‘rsatdiki, 21-avgust kuni bazada birinchi to‘rtta Tu-160 samolyoti paydo bo‘lgan. Va 25-sentabrda uchta Tu-95 paydo bo‘ldi, deya aniqlik kiritadi manba.
Gazeta suhbatlashgan ekspertlarning tan olishicha, havo guruhining Norvegiya bilan chegaralariga joylashtirilishi Rossiyaning Grom strategik yadroviy kuchlarining odatda oktabr oyida o‘tkaziladigan mashg‘ulotlari bilan bog‘liq bo‘lishi mumkin. Biroq oxirgi marta mashg‘ulotlar vaqti 2021-yilning oktabridan 2022-yilning fevraliga ko‘chirildi, bu deyarli Rossiyaning Ukrainaga harbiy bosqinining boshlanishiga to‘g‘ri kelgan.
“Strategik bombardimonchi samolyotlarni joylashtirish va mashq qilish o‘z-o‘zidan yadroviy to‘siqning bir ko‘rinishidir, shuning uchun umuman olganda buni Putinning yadro qurolidan foydalanish tahdidlarining bir qismi sifatida ko‘rish mumkin”, — dedi norvegiyalik harbiy ekspert Lars Peder Xaga.
Norvegiya Mudofaa tadqiqotlari instituti professori Katarjina Zisk ham shunday fikrda. Uning so‘zlariga ko‘ra, bombardimonchilarning joylashtirilishi Putin tahdidlariga ishonchni oshirish uchun qilinayotgan ishlarning bir qismidir.
Izoh (0)