Сунъий йўлдошдан олинган сўнгги суратлар Россия Норвегия чегараси яқинида ядровий қуролга эга 11 та бомбардимончи самолётларини жойлаштирганини кўрсатмоқда, деб ёзади «Агентство Новости». Ҳарбий экспертларнинг фикрича, Россия шу тариқа Ғарбга сигнал юбормоқда.
Норвегиялик журналистларнинг ёзишича, суратлар Planet Labs томонидан 7 октябрь куни эрталаб олинган. Уларда Мурманск вилоятидаги Оленя авиабазасида еттита Ту-160 ва тўртта Ту-95 тасвирга туширилган.
Икки кундан кейин Ту-160 самолётларидан бири аэродромнинг учиш-қўниш йўлагида суратга олинган.
Манбада ёзилишича, Россия бомбардимончи самолётларининг мавжудлиги узоқ муддатли характерга эга. Одатда, бу ҳарбий самолётлар Саратов вилоятидаги Энгельс авиабазасида жойлаштириларди. Сунъий йўлдош тасвирлари таҳлили шуни кўрсатдики, 21 август куни базада биринчи тўртта Ту-160 самолёти пайдо бўлган. Ва 25 сентябрда учта Ту-95 пайдо бўлди, дея аниқлик киритади манба.
Газета суҳбатлашган экспертларнинг тан олишича, ҳаво гуруҳининг Норвегия билан чегараларига жойлаштирилиши Россиянинг Гром стратегик ядровий кучларининг одатда октябрь ойида ўтказиладиган машғулотлари билан боғлиқ бўлиши мумкин. Бироқ охирги марта машғулотлар вақти 2021 йилнинг октябридан 2022 йилнинг февралига кўчирилди, бу деярли Россиянинг Украинага ҳарбий босқинининг бошланишига тўғри келган.
«Стратегик бомбардимончи самолётларни жойлаштириш ва машқ қилиш ўз-ўзидан ядровий тўсиқнинг бир кўринишидир, шунинг учун умуман олганда буни Путиннинг ядро қуролидан фойдаланиш таҳдидларининг бир қисми сифатида кўриш мумкин», — деди норвегиялик ҳарбий эксперт Ларс Педер Хага.
Норвегия Мудофаа тадқиқотлари институти профессори Катаржина Зиск ҳам шундай фикрда. Унинг сўзларига кўра, бомбардимончиларнинг жойлаштирилиши Путин таҳдидларига ишончни ошириш учун қилинаётган ишларнинг бир қисмидир.
Изоҳ (0)