Rossiyaning Ukrainaga yadroviy hujumi yadroviy javob emas, balki Yevropa Ittifoqi davlatlari, NATO va AQSHning kuchli harbiy javobiga sabab bo‘ladi. Bu haqda YI diplomati Jozep Borrel Bryuggedagi Yevropa Diplomatik akademiyasining ochilish marosimida aytib o‘tdi.
“Yadroviy tahdid mavjud. Rossiya prezidenti Vladimir Putin quruq po‘pisa qilmayotganini aytdi. U bunday qilolmaydi ham. Ukrainani qo‘llab-quvvatlayotganlar: YI, unga a’zo davlatlar, AQSH va NATO ham po‘pisa qilmayapti. Ukrainaga qarshi har qanday yadroviy hujum yadroviy javobni emas, balki kuchli harbiy javobni keltirib chiqaradi”, — dedi Borrel va bunday javob Rossiya armiyasi uchun “halokatli” bo‘lishini qo‘shimcha qildi.
Rossiya Ukrainaga bostirib kirganidan keyin Rossiya prezidenti Vladimir Putin, hukumat amaldorlari va targ‘ibotchilar Rossiya yadro qurolidan foydalanishi mumkinligiga qayta-qayta ishora qildi. 21-sentabr kuni Putin safarbarlik boshlanishi haqidagi murojaatida Rossiya hukumati o‘z hududlarini himoya qilish uchun “ixtiyoridagi barcha vositalarni” ishga solishga tayyorligini aytdi.
Qo‘shma Shtatlar va uning ittifoqchilari Rossiya yadro quroli ustidan nazoratni kuchaytirdi. Biroq Vashington hozircha Moskvaning Ukrainada yadro qurolidan foydalanishga tayyorligi belgilarini ko‘rmayapti.
Izoh (0)