“Rossiya tinchlikning afzalligi haqida o‘ylashi uchun hisob-raqamlarida nolni ko‘rishi kerak” — Zelenskiy Moskvani neft-gaz daromadlaridan mahrum qilishga chaqirdi

Ukraina prezidenti Vladimir Zelenskiy Yevropa kengashi parlament assambleyasida so‘zlagan nutqida Yevropa davlatlarini Rossiyaning Ukrainaga bostirib kirishini moliyalashtira olmasligi uchun Rossiya energiya manbalaridan voz kechishga chaqirdi, deb yozadi Meduza.

“Biz Rossiyaning urushni moliyalashtirish qobiliyatini yanada kamaytirish uchun kelishuvimizni davom ettirishimiz kerak. Xususan, tajovuzkor davlatni neft va gaz eksportidan tushadigan daromaddan mahrum qilish muhim ahamiyatga ega. Rossiya tinchlikning afzalliklari haqida o‘ylashi uchun hisob-raqamlarida nolni ko‘rishi kerak. Yevropa Ittifoqining sanksiyalar paketining ma’nosi aynan mana shu bo‘lishi lozim”, — dedi Zelenskiy.

Ukraina prezidenti, shuningdek, Yevropa davlatlarini Rossiyaning Zaporojye AESdan chiqib ketishiga majburlashga chaqirdi.

“Rossiya u yerdan nafaqat harbiy texnikasini, balki barcha jangarilarini ham olib chiqib ketishi kerak”, — dedi u.

Undan tashqari, Zelenskiy Ukrainaga havo hujumidan mudofaa tizimlarini yetkazib berishga va’da bergan davlatlarga alohida minnatdorchilik bildirdi va agar “Ukraina osmonini Rossiya terroridan himoya qilish” imkoni bo‘lsa, bu urushni tezda tugatish uchun “asosiy qadam” bo‘lishi mumkinligini aytdi.

Zelenskiy Yevropani Rossiya uchun maxsus tribunal tuzishga va Ukrainaga yetkazilgan zarar uchun tovon undirish mexanizmi loyihasini qo‘llab-quvvatlashga ham chaqirdi.