1970-yildan 2018-yilgacha bo‘lgan davrda sayyoradagi yovvoyi hayvonlar soni 69 foizga qisqargan. Bu haqda Jahon yovvoyi tabiat fondi (WWF — World Wildlife Fund)ning “Jonli sayyora — 2022” ma’ruzasida aytiladi. O‘rmon daraxtlarining kesib tashlanishi, okeanlarning ifloslanishi va iqlim o‘zgarishi — buning asosiy sabablari. Kelajakda bioxilma-xillikning kamayishi yanada kuchayib boraveradi, degan fikrda ma’ruza mualliflari.
Har xil sutemizuvchilar, qushlar, amfibiyalar, sudralib yuruvchilar va baliqlarning 32 mingta turi haqidagi ma’lumotlarni o‘z ichiga oluvchi WWF jonli sayyora indeksi ularning soni butun dunyo bo‘ylab pasayishda tezlashayotganini ko‘rsatmoqda. Aniqlik kiritilishicha, ikki yil avval yo‘qolib borayotgan yovvoyi hayvonlar ulushi 68 foizni, 2018-yilda — 60 foizni tashkil qilgan.
Shu bilan birga, 48 yil mobaynida eng ko‘p Lotin Amerikasi va Karib havzasida yovvoyi hayvonlar soni qisqargan, shu jumladan, Amazonkada kamayish 94 foizni tashkil etgan. WWF’ning Buyuk Britaniya bo‘linmasi ijrochi direktori Tani Stilning fikricha, buning asosiy sababi Amazonkani mashhur qilgan tropik o‘rmonlarning kesilishidir.
Yovvoyi hayvonlar kamayishi bo‘yicha eng past ko‘rsatkich Yevropa va Markaziy Osiyoda qayd etildi, u yerda bu 18 foizga teng bo‘ldi.
Tadqiqotchilar hayvonlar yer usti landshaftlari bo‘ylab harajatlanish chog‘ida duch kelayotgan qiyinchiliklar ko‘payganiga e’tibor qaratdi. Gap jonivorlarning erkin ko‘chib yurishiga to‘sqinlik qilayotgan katta sonli infratuzilma obyektlari haqida bormoqda.
Izoh (0)