Rossiyaning Chelyabinsk viloyatidan safarbar qilingan besh kishi “Donbassda maxsus harbiy operatsiya hududida” halok bo‘lgan. Bu haqda shu viloyat gubernatori va ma’muriyati matbuot xizmatiga tayanib, “74.ru” nashri xabar bergan.
Marhumlarning barchasi Chelyabinsk viloyatining Korkino shahrida safarbar etilgan.
“Afsuski, harbiy komissariat Korkino harbiy komissariatidan safarbar qilingan besh nafar janubiy urallikning o‘limi haqidagi ma’lumotni tasdiqladi. Chuqur va samimiy hamdardlik izhor etamiz”, — deya ma’lum qilishgan gubernator va ma’muriyat matbuot xizmatida.
Xabarda safarbar etilganlar qayerda va qanday vaziyatda halok bo‘lganiga aniqlik kiritilmagan. Shu bilan birga, matbuot xizmati qayd etishicha, marhumlarning oilalariga safarbar qilinganlar frontda halok bo‘lgan taqdirda, belgilangan boshqa to‘lovlarga qo‘shimcha ravishda, tezkor tartibda bir million rubldan ajratiladi.
BBC yozishicha, Rossiya hukumati birinchi marta frontda safarbar etilganlarning halok bo‘lgani haqida rasman bayonot bermoqda. Ukrainada nobud bo‘lganlar haqidagi ilk xabarlar shu hafta boshida kelib tusha boshlagan, ammo hukumat ular yuzasidan izoh bermagan edi.
10-oktabr kuni “Vecherniy Karpinsk” nashri Xerson ostonalarida safarbar etilgan uch kishi halok bo‘lgani haqida yozgandi. 12-oktabr kuni “Agora” huquqni himoya qilish guruhi rahbari Pavel Chikov Lisichansk yaqinida Peterburgdan safarbar qilingan advokat Andrey Nikiforov halok bo‘lganini ma’lum qilgandi.
Rossiyada safarbarlik 21-sentabr kuni boshlandi. O‘shandan buyon, Meduza hisob-kitoblariga ko‘ra, safarbar etilgan, ammo frontga jo‘nashga ulgurmagan 20 ga yaqin odam vafot etgan.
Izoh (0)