Superliga to‘purari Temurxo‘ja Abduxoliqov 3 o‘yinga diskvalifikatsiya qilindi

O‘FA Tartib-intizom qo‘mitasi 12-oktabr kuni navbatdagi qarorlarini e’lon qildi.

“Qizilqum” hujumchisi Temurxo‘ja Abduxoliqov Superliga 20-turi doirasida “Metallurg”ga qarshi kechgan o‘yindagi harakati uchun uchta o‘yinga diskvalifikatsiya qilindi va jarimaga tortildi.

Abduxoliqov uchrashuvning 90+6-daqiqasida to‘p uchun kurash vaqtida mehmonlar darvozaboniga oyog‘i bilan zarba bergan va maydondan chetlatilgandi.

Mazkur o‘yin yakunida muxlislar hakam sha’niga nisbatan haqoratli so‘zlar ishlatgan va maydonga turli buyumlarni uloqtirgan. Shu sabab “Qizilqum”ga nisbatan jarima belgilandi va bu holat takrorlansa, kelgusi uy uchrashuvlarini muxlislarsiz o‘tkazishi yuzasidan ogohlantirish berilgan.

Shu tariqa medallar uchun kurashayotgan “Qizilqum” 22—24-turlar davomida asosiy to‘purari xizmatidan foydalana olmaydi.

Temurxo‘ja joriy mavsum Superligada 20 ta o‘yinda ishtirok etib, 11 ta gol urgan va to‘purarlar ro‘yxatida birinchi o‘rinda ketmoqda.