Ukraina Xavfsizlik xizmati Rossiya Federatsiyasi Xavfsizlik kengashi raisi o‘rinbosari Dmitriy Medvedev hamda bir qator yuqori martabali rossiyaliklarni qidiruvga berdi, deya xabar qiladi “RIA Novosti”.
Ukraina Ichki ishlar vazirligining ma’lumotlar bazasida Medvedevning ma’lumotlari bo‘lgan karta paydo bo‘ldi. U “tergovga qadar tergov organlaridan yashiringan” shaxslar toifasiga kiritilgan.
Ukraina Xavfsizlik xizmati Medvedevni mamlakatning hududiy yaxlitligi va daxlsizligiga tajovuz qilishda aybladi (Ukraina Jinoyat kodeksining 110-moddasi 2-qismi; hokimiyat vakili tomonidan yoki bir guruh shaxslar bilan oldindan kelishib, milliy adovatni qo‘zg‘atish). Ushbu moddada nazarda tutilgan eng yuqori jazo 10 yilgacha ozodlikdan mahrum qilishdir.
Medvedev Rossiyaning Ukrainadagi maxsus operatsiyasi haqida bir necha bor gapirgan. U o‘zining Telegram kanalida Moskva, Kiyev va G‘arb davlatlarining xatti-harakatlariga muntazam izoh berib keladi.
Medvedev 10-oktabr kuni avvalroq Telegram’da so‘nggi postni joylashtirgan va “birinchi epizod ijro etilgani” va “boshqalari ham bo‘lishini” ta’kidlagan. Bu post Rossiyaning Ukrainadagi infratuzilmaga zarbasi fonida ulashilgan, bu esa o‘z navbatida Qrim ko‘prigidagi portlashdan keyin sodir bo‘lgan. Rossiya rasmiylari portlash Ukraina maxsus xizmatlari tomonidan uyushtirilgan deb hisoblamoqda.
Undan tashqari, Rossiya Tashqi ishlar vazirligi matbuot kotibi Mariya Zaxarova va Rossiya Mudofaa vazirligining rasmiy vakili Igor Konashenkov ham xuddi shu jinoiy ish yuzasidan Ukrainada qidiruvga berilgan.
Shuningdek, Ukraina Xavfsizlik xizmatining qidiruvga berilganlar ro‘yxatiga 700 ga yaqin yuqori martabali rossiyaliklar kiritilgani ham ma’lum. Qayd etilishicha, ularning deyarli barchasi Davlat Dumasi deputatlari va Federatsiya Kengashi a’zolari, shuningdek, huquqni muhofaza qilish organlari rahbarlaridir, bosh prokuror Igor Krasnov va tergov qo‘mitasi raisi Aleksandr Bastrikin bundan mustasno.
Keyinroq Rossiya tergov qo‘mitasi raisi Aleksandr Bastrikin Ukrainada Dmitriy Medvedevga nisbatan qo‘zg‘atilgan jinoiy ishni “noqonuniy ta’qib” deb atadi va Ukraina Xavfsizlik xizmati mansabdor shaxslariga nisbatan jinoiy ish qo‘zg‘atilishini ma’lum qildi.