Петербургда муҳожирлар ўртасида жанжал юз берди, Ўзбекистон фуқароси бошидан ўқ еди

Россиянинг Санкт-Петербург шаҳри Красносельский туманида муҳожирлар орасида келиб чиққан низо отишма билан якунланди, деб хабар бермоқда «78.ru».

«112» хизматига бир неча киши муштлашаётгани ва ўқ овозлари эшитилгани ҳақида хабар келиб тушган.

Воқеа жойида ўқотар қурол билан бошидан яраланган 27 ёшли Ўзбекистон фуқароси аниқланган. У ўртача оғир аҳволда касалхонага етказилган.

Жиноятни содир этишда гумонланиб, уч киши — Туркманистон, Арманистон ва Ўзбекистон фуқаролари қўлга олинган. Айни пайтда жиноят иши қўзғатиш масаласи кўриб чиқилмоқда.

Ўзбекистон Ташқи меҳнат миграцияси агентлиги Россиядаги меҳнат мигрантлари иштирокида содир бўлган муштлашув юзасидан изоҳ берди.

«Ушбу жанжал оқибатида Ўзбекистон фуқароси 1994 йилда туғилган Д.А. жароҳат билан шаҳар шифохонасига ётқизилган. Ҳозирги вақтда унинг ҳолати яхши», — дейилади хабарда.

Россияда муҳожирларнинг муштлашув уюштириши тез-тез содир бўлиб туради. Чунончи, шу йилнинг июлида Москванинг шарқий қисмидаги «Руднёво» саноат зонасида жойлашган қурилиш майдонида 60 дан ортиқ муҳожир таёқ ва биталардан фойдаланиб, муштлашув уюштирганди.

2021 йил августида Санкт-Петербургдаги Фрунзе туманида ўзбекистонлик тўрт нафар муҳожир София сабзавотлар базасидаги жанжалдан сўнг полиция идорасига олиб кетилган ва маъмурий жавобгарликка тортилганди.

Ундан сал аввалроқ Россия ҳукумати Москвадаги «Кузминки» метро бекати яқинида оммавий муштлашув содир этган муҳожирларнинг 46 нафарини мамлакатдан депортация қилганди.