Navoiy viloyatida aksiz markasiz tamaki mahsulotlarining muomalaga kiritilishining oldi olindi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Navoiy viloyat boshqarmasi tomonidan IIB va bojxona boshqarmasi xodimlari bilan hamkorlikda tezkor tadbir o‘tkazilgan. Unda Navoiy—Zarafshon yo‘nalishida harakatlanib kelayotgan Lacetti avtotransport vositasi to‘xtatib ko‘zdan kechirilgan.
Natijada tamaki mahsulotlari savdosi bilan shug‘ullanib kelgan O.N. xorijda ishlab chiqarilgan umumiy qiymati 76,7 million so‘mlik 2 980 dona aksiz markasiz tamaki mahsulotlarini o‘tkazish maqsadida olib ketayotganligi aniqlanib, ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)