“Kredit — o‘zini o‘zi qarzga botirish”, “Aqidamizga to‘g‘ri kelmaydi” — “Daryo” aholi orasida kichik so‘rovnoma o‘tkazdi

Bugungi kunda O‘zbekistonda kredit tizimi takomillashib, uning yangi turlari ko‘paymoqda. “Daryo” internet nashri aholining mazkur mavzu borasidagi fikrlarini o‘rganish maqsadida kichik so‘rovnoma o‘tkazdi.

“Kredit olganman, lekin qaytib olmaslikka qaror qildim. Ustida foizi bor. Undan ko‘ra pulni yig‘ib, kerakli narsani keyinroq olgan ma’qul. Foydali tomoni pul yo‘qligida imkoniyatingiz cheklanib qolmaydi. Olib ishlatishingiz mumkin. Lekin qo‘shimcha yana pul to‘lash moddiy tomondan noqulaylik tug‘diradi”, — deydi qatnashchilardan biri.

So‘rovnoma ishtirokchilaridan yana biri kredit olishdagi hujjatlar bilan bog‘liq noqulayliklar sabab olishni xohlamaganini ta’kidladi.

“Kredit olishga taliflar bo‘lgan, lekin olmaganman. Tadbirkor sifatida olaman deganda, qog‘ozbozlik, hujjat ko‘p so‘rash bo‘ladi. Mana shunaqa narsalari bor. E’lon yoki reklamalarda faqat pasport kerak deyiladi, biroq borganingizdan keyin qo‘shimcha ko‘p narsalarni so‘rashadi. Uncha daxmaza bilan olmagan ma’qul, degan xulosaga kelib qoldim”, — deydi u.

Fikr bildirganlarning ba’zilari kredit olishning ijobiy tomonlari haqida aytib o‘tdi.

“Foydali tomonlari bor. Masalan, pul kam paytda foydalanib, keyin sekin-sekin to‘lash mumkin”

“Kredit berish hozir juda ham oson bo‘ldi. Odamlarning puli bo‘lmasa ham, borib bemalol olsa bo‘ladi”, — deydi so‘rovnoma ishtirokchisi.

Avvalroq “Daryo”da O‘zbekistonning qaysi hududlariga ko‘proq kredit berilayotgani haqida ma’lumot berilgan edi.