Andijon viloyatining Marhamat tumanida adliya bo‘limi tomonidan tuman tibbiyot birlashmasining 174 nafar xodimiga kechiktirilgan ta’til pullari undirib berildi. Bu haqda “Daryo” muxbiri Umidjon Mamarasulov xabar bermoqda.
Marhamat tuman adliya bo‘limi boshlig‘i Sardorbek Hamroyevning ma’lum qilishicha, bo‘lim tomonidan tuman tibiyot birlashmasida normativ-huquqiy hujjatlarning ijro etilishi hamda mehnat qonunchiligi talablariga rioya etilishi holati yuzasidan yuzasidan o‘rganish va monitoring ishlari amalga oshirilgan.
Monitoring davomida tibbiyot birlashmasi hisobchilari tomonidan joriy yilning sentabr oyi uchun yillik mehnat ta’tillariga chiqqan 174 nafar xodimga oktabr oyiga o‘tilgan bo‘lsa-da ta’til pullari to‘lab berilmaganligi aniqlangan.Vaholanki, Mehnat kodeksining 148-moddasi (ta’tillar uchun haq to‘lash) 2-qismida ta’til uchun haq to‘lash jamoa shartnomasida belgilangan muddatlarda, lekin ta’til boshlanmasidan oldingi oxirgi ish kunidan kechikmay amalga oshirilishi belgilangan.
Shunga asoslanib, tibbiyot birlashmasi boshlig‘i nomiga qonunbuzilish holatlarini bartaraf etish yuzasidan taqdimnoma kiritilib, jami 235 million so‘m miqdoridagi ta’til pullari hisoblanib, to‘lab berilishi ta’minlandi, — deydi bo‘lim boshlig‘i Sardorbek Hamroyev.
Izoh (0)