“Direktor o‘rinbosari shu video bilan rahbarini qo‘rqitib, rag‘bat yozdirgan”. Chiroqchi XTB mudiri ijtimoiy tarmoqda tarqalgan videoni izohladi

Ijtimoiy tarmoqlarda maktab qorovulxonasida direktor va kotib, shuningdek qorovul spirtli ichimlik ichib o‘tirgani aks etgan video tarqalgandi. “Daryo” bilan suhbatda bo‘lgan Chiroqchi XTB mudiri Farhod Jumanov voqea tumandagi 67-maktabda sodir bo‘lganini ma’lum qildi.

Tuman XTB mudirining ma’lumot berishicha, videoda direktor ekani aytilgan kishi 67-umumiy o‘rta ta’lim maktabining 39 yoshli direktori Lochin Turdimurodov hisoblanadi.

Viloyatimizning Dehqonobod tumanidan kelgan Lochin Turdimurodov ushbu maktabda 2021-yilning 31-martidan beri faoliyat yuritib keladi, — deydi bo‘lim mudiri.

Farhod Jumanovning dastlabki ma’lumotiga ko‘ra, video taxminan 2022-yil 5-iyul kuni maktab qorovulxonasida suratga olingan.

Video direktorning ma’naviy-ma’rifiy ishlari bo‘yicha o‘rinbosari A.Norimovning shaxsiy telefoni orqali tasvirga olingan. Maktab direktori va o‘rinbosari o‘rtasidagi kelishmovchiliklar sabab o‘rinbosar shu videodan foydalanish maqsadida direktorga ko‘rsatib, rag‘bat puli yozishni talab qilgan. Natijada A.Norimovga rag‘batlantirish puli to‘lab berilgan. 2022-yil avgust oyida esa respublika audit nazorati tomonidan o‘rganilganda rag‘bat maktabning pedagoglar kengashi tomonidan ko‘rib chiqilmasdan to‘langan deb xulosa qilingan va qayta to‘lashga tushgan. A.Norimov bunga javoban ushbu videolavhani oradan uch oy o‘tib, 2022-yil 5-oktabr kuni ijtimoiy tarmoqlarga joylagan, — deydi Farhod Jumanov.

XTB mudirining qo‘shimcha qilishicha, maktab direktori Lochin Turdimurodov ayni kunda viloyat xalq ta’lim boshqarmasining 2022-yil 30-sentabrdagi xatiga asosan Abdulla Avloniy nomidagi pedagoglarni kasbiy rivojlantirish va metodikalarga o‘rgatish milliy tadqiqot institutida malaka oshirmoqda.

Direktorga telefon qilib, vaziyatni so‘raganimizda spirtli ichimlik deya videoda ko‘rsatilgan shishada somsaga sepish uchun “uksus” bor bo‘lganini aytdi. Videoda qatnashgan texnik xodimlar bilan bog‘lanish imkoni bo‘lmadi. Holat yuzasidan qo‘shimcha axborot beramiz, — deydi XTB mudiri.

Ma’lum qilinishicha, 67-maktab viloyatdagi maktablar reytingida 818-o‘rinda, tumandagi reytingda esa 78-o‘rinda turadi. O‘quvchilarining oliy ta’limga kirish ko‘rsatgichi 2022-yilda 65,3 foizni tashkil qilgan.