Давлат божхона қўмитаси томонидан Тошкент шаҳридаги заводлардан бирида ноқонуний муомаладан олиб қўйилган тамаки маҳсулотларини йўқ қилиш тадбири ўтказилди. Бу ҳақда «Дарё» мухбири хабар бермоқда.
Маълум қилинишича, жорий йилнинг 23 июнь куни Тошкент вилояти божхона бошқармаси тезкор тузилмалари томонидан ДХХ ходимлари билан биргаликда Оҳангарон туманида ўтказилган тезкор тадбирда аввалдан кузатувга олинган Hyundai Porter II русумли юк автомашинаси тўхтатилиб, холислар иштирокида кўздан кечирилади. Автомашина юкхонасида 3 та номдаги, қиймати 175 миллион сўмлик 25 минг қути ноқонуний тамаки маҳсулотлари борлиги аниқланади. Ашёвий далил тариқасида олинган бу маҳсулотлар хорижда ишлаб чиқарилган бўлиб, рақамли маркировка кодларига эга бўлмаган ҳамда акциз маркалари билан қадоқланмаган.
Ҳолат юзасидан жиноят иши қўзғатилиб, 2022 йилнинг 6 сентябрь куни жиноят ишлари бўйича Оҳангарон туман суди томонидан ушбу тамаки маҳсулотларини йўқ қилиш юзасидан ҳукм ўқилган. Йўқ қилиш тадбирида ушбу 25 минг қути тамаки маҳсулотлари иштирокчилар гувоҳлигида махсус ускунада майдаланиб, ёқиб юборилди.
Давлат божхона қўмитаси бошқарма бошлиғи Акромжон Аҳлимирзаев тамаки контрабандасига қарши курашиш масаласида фикр билдирди.
«Ноқонуний тамаки маҳсулотларни чегарадан олиб ўтилишига ва сотилишига қарши курашиш божхона олдидаги муҳим вазифалардан саналади. Афсуски, ички бозоримизда бу каби арзон ва сифатсиз маҳсулотларга талаб бор. Буни инкор қилиб бўлмайди. Албатта, бу йўналишда божхона назорати кучайтирилган. Ноқонуний тамаки савдоси учун катта жарималар белгиланган. Бунга қарши кескин кураш олиб бормоқда. Лекин бу муаммони фақатгина жазолаш билан ечиш қийин. Халқимизга масаланинг моҳиятини тўғри етказиб беришимиз муҳим. Жамият контрабанда маҳсулотлар савдосига муросасиз бўлиши керак. Чекиш инсон саломатлигига зарар. Таркиби кафолатланмаган тамакини истеъмол қилиш эса соғлиқни икки карра хавфга қўйиш билан баробар», – деди мутахассис.
Тадбирда маълум қилинишича, божхона органлари томонидан жорий йилнинг 9 ойи мобайнида ноқонуний тамаки маҳсулотлари билан боғлиқ жами 269 та ҳуқуқбузарлик ҳолатлари аниқланган бўлиб, улар бўйича 1 миллион 458 минг 736 қути тамаки маҳсулотлари ушлаб қолинган. Мазкур тамаки маҳсулотларининг умумий қиймати салкам 17,8 миллиард сўмни ташкил этади.
Божхона органлари томонидан 60 дан ортиқ ҳолатда айбдор шахсларга нисбатан жиноят ишлари қўзғатилиб, тергов органларига юборилган.
Шунингдек, 175 та ҳуқуқбузарлик ҳолатлари бўйича маъмурий ишлар юритилиб, кўриб чиқиш учун жиноят ишлари бўйича судларга юборилган.
Давлат божхона қўмитаси суриштирувчиси Дилшод Мақсудов ноқонуний тамаки маҳсулотларини йўқ қилишнинг қонуний асосларига тўхталди.
Дилшод МақсудовФото: «Дарё»
«Вазирлар Маҳкамасининг 2009 йилдаги «Давлат даромадига ўтказиладиган мол-мулкни олиб қўйиш, сотиш ёки йўқ қилиб ташлаш тартиби тўғрисида»ги қарори билан тасдиқланган низомнинг 7-бобида суд қарорига кўра мусодара қилинган тамаки маҳсулотларини йўқ қилиб ташлаш тартиби белгиланган. Унга кўра, мусодара қилинган тамаки маҳсулотларини йўқ қилиш ишларини ташкиллаштириш давлат ижрочиси томонидан амалга оширилади», – деди у.
Изоҳ (0)