Qashqadaryo viloyati Moliya boshqarmasi boshlig‘i Fayzulla Yusupov xodimlarini haqorat qilgani aytilgan audioyozuv tarqaldi. Viloyat hokimligi axborot xizmati rahbari Ahror Sodiqovning “Daryo”ga ma’lumot berishicha, audioyozuv eski va mas’ul buning uchun jazolangan.
Ta’kidlanishicha, bu holat 2021-yil viloyat hokimining sobiq birinchi o‘rinbosari Nodir Erkayev rahbarligida muhokama qilingan. Va ish faoliyatida xodimlariga nisbatan odob-axloq normalariga amal qilmagan holda, ularni haqorat qilgan viloyat Moliya bosh boshqarmasi boshlig‘i Fayzulla Yusupov qat’iy ogohlantirilgan.
Shuningdek, o‘sha paytda bu kabi holatlarning viloyatdagi boshqa tashkilot rahbarlari ish faoliyatida ham qaytarilishining oldini olish maqsadida, rahbarlar mas’uliyatini oshirish, viloyat Moliya boshqarmasi boshlig‘i Fayzulla Yusupov ishini ko‘rib chiqish yuzasidan Moliya vazirligiga taqdimnoma kiritilgan. Ayni kunda esa aynan o‘sha paytda yozib olingan audioyozuvlar yangi audiolar sifatida tarqatilmoqda, — deydi Ahror Sodiqov.Mazkur audioyozuvda boshqarma boshlig‘ining “O‘zingni o‘zing ossang bo‘lmaydimi?”, “Zamon to‘g‘ri kelganda peshonangdan otardim”, “Ayollar, ko‘kragingni ochib yurma bu yerda. Hech kim sening ko‘kragingni ko‘raman deb kelayotgani yo‘q, boshqa joyda ochib ko‘rsat”, “Hokimingga chiqaman, qani bir minutda jazolab bermasin-chi, sendaqa moliya mudirchalarini”, degan gaplari yangragan.
Mazkur axborotni o‘quvchilariga ilingan bloger Kapitan Karimov “O‘zbekiston Respublikasi Moliya vaziri bu xodimni ishdan olishini so‘rab qolardik”, deb yozgan bo‘lsa, Telegram’dagi “Qitmir muxbir” “Fayzulla akaning gaplari tizimning yuzini ochgandek, nazarimda. Demak, tizimda dunyoni suv bossa to‘pig‘iga chiqmaydigan, topshiriq bersa, bajarmaydigan yoki bajarolmaydigan rahbarlar, shuningdek qomatini ko‘z-ko‘z qiladigan ayol bor”, deya munosabat bildirgan.
“Daryo” jurnalisti bilan muloqotda bo‘lgan Fayzulla Yusupov mazkur audioyozuv 2021-yildagi yig‘ilishida yozib olinganini, bu uchun o‘sha paytda jazolanganini, ayni kunga kelib ovozlar yana birlashtirilib, yangi audioyozuv sifatida tarqatilayotganini bildirdi.
Ovozlarni solishtirib ko‘rsangiz bunga o‘zingiz ham ishonch hosil qilasiz. Bu xatoyim uchun jazolanganman va bu xatoni takrorlamayman, — deydi Fayzulla Yusupov.
Izoh (0)