Toshkent shahar hokimligi tomonidan aholi farovonligini aniqlash yuzasidan so‘rovnoma o‘tkazildi. Bu haqda hokimlik axborot xizmati xabar berdi.
Qayd etilishicha, so‘rovda shaharning 12 tumanidan turli yoshdagi 1 ming 606 nafar erkak va ayollar ishtirok etgan. Xususan, qatnashchilarning 43,2 foizi oilaviy moddiy ahvoli o‘rtacha ekanini bildirgan. Respondentlarning 38,9 foizi moddiy ahvoli pastligini, 14,6 foizi moddiy ahvoli juda past ekanini aytgan.
Tumanlar kesimida Yakkasaroy, Shayxontohur, Mirzo Ulug‘bek va Olmazor tumanlaridagi respondentlarning aksariyati moliyaviy ahvolini o‘rtacha, deb baholaydi. Yakkasaroy tumanidagi respondentlarning katta qismi moddiy ahvolini yuqori deb baholasa, Yangihayot, Chilonzor, Sergeli va Bektemir tumanlari aholisining aksariyati moddiy ahvoli darajasi pastligini qayd etgan.
“Respondentlar daromadlarida barqarorlik kuzatilmoqda: ularning deyarli yarmi moliyaviy ahvoli o‘tgan yilga nisbatan o‘zgarmagan deb hisoblaydi. Respondentlarning atigi 10,5 foizi u yomonlashganini qayd etgan. Shu bilan birga, ularning 33,7 foizi moliyaviy ahvoli bir yildan keyin yaxshilanadi, 40,7 foizi esa moliyaviy ahvoli hozirgidek qoladi, deb hisoblaydi.
Respondentlar ijtimoiy mavqeyi yuzasidan ham qiziqarli holatni kuzatish mumkin. Ularning 44 foizi o‘zini “o‘rta” sinf, 42,3 foizi o‘rta sinfdan past deb hisoblaydi. Respondentlarning 1,4 foizi o‘zini boy, 12,4 foizi esa kambag‘al degan fikrda. Qizig‘i shundaki, ishtirokchilarning daromad darajasi o‘zlarini “o‘rta” qatlam sifatida ko‘rsatishda hal qiluvchi omil emas. Daromad darajasi 1-3 million so‘m va 10 million so‘mdan ortiq bo‘lgan respondentlar o‘zlarini teng darajada “o‘rta” tabaqaga kiritishlari mumkin”, – deyiladi hisobotda.
Bandlik bo‘yicha 10 million so‘mdan ortiq daromadning eng yuqori darajasi axborot texnologiyalari, savdo, transport/logistika, xizmat ko‘rsatish va davlat tashkilotlari sohalarida band bo‘lgan mutaxassislarda aniqlangan. Respondentlarning 54,9 foizi daromad darajasi va ehtiyojlarini qondirish imkoniyatidan qisman mamnun. So‘rovnoma ishtirokchilarining 31,4 foizi o‘z daromadlaridan mutlaqo noroziligini bildirgan. Qatnashchilarning 5,3 foizi o‘z daromadlaridan to‘liq qoniqish hosil qilgan.
Respondentlarning 15 foizi o‘zi uchun mablag‘ jamg‘arish imkoniyatiga ega. Qolgan 77,5 foiz respondentlar uchun esa bunday imkoniyat mavjud emas.
“Uy-joy sharoitidan qoniqish darajasini o‘rtacha deb atash mumkin, chunki so‘rov ishtirokchilarining 40,7 foizi “mamnun”, 31,4 foizi “mamnun emas”– deyiladi axborotda.
Izoh (0)