Қашқадарё вилояти Молия бошқармаси бошлиғи Файзулла Юсупов ходимларини ҳақорат қилгани айтилган аудиоёзув тарқалди. Вилоят ҳокимлиги ахборот хизмати раҳбари Аҳрор Содиқовнинг «Дарё»га маълумот беришича, аудиоёзув эски ва масъул бунинг учун жазоланган.
Таъкидланишича, бу ҳолат 2021 йил вилоят ҳокимининг собиқ биринчи ўринбосари Нодир Эркаев раҳбарлигида муҳокама қилинган. Ва иш фаолиятида ходимларига нисбатан одоб-ахлоқ нормаларига амал қилмаган ҳолда, уларни ҳақорат қилган вилоят Молия бош бошқармаси бошлиғи Файзулла Юсупов қатъий огоҳлантирилган.
Шунингдек, ўша пайтда бу каби ҳолатларнинг вилоятдаги бошқа ташкилот раҳбарлари иш фаолиятида ҳам қайтарилишининг олдини олиш мақсадида, раҳбарлар масъулиятини ошириш, вилоят Молия бошқармаси бошлиғи Файзулла Юсупов ишини кўриб чиқиш юзасидан Молия вазирлигига тақдимнома киритилган. Айни кунда эса айнан ўша пайтда ёзиб олинган аудиоёзувлар янги аудиолар сифатида тарқатилмоқда, — дейди Аҳрор Содиқов.Мазкур аудиоёзувда бошқарма бошлиғининг «Ўзингни ўзинг оссанг бўлмайдими?», «Замон тўғри келганда пешонангдан отардим», «Аёллар, кўкрагингни очиб юрма бу ерда. Ҳеч ким сенинг кўкрагингни кўраман деб келаётгани йўқ, бошқа жойда очиб кўрсат», «Ҳокимингга чиқаман, қани бир минутда жазолаб бермасин-чи, сендақа молия мудирчаларини», деган гаплари янграган.
Мазкур ахборотни ўқувчиларига илинган блогер Капитан Каримов «Ўзбекистон Республикаси Молия вазири бу ходимни ишдан олишини сўраб қолардик», деб ёзган бўлса, Telegram’даги «Қитмир мухбир» «Файзулла аканинг гаплари тизимнинг юзини очгандек, назаримда. Демак, тизимда дунёни сув босса тўпиғига чиқмайдиган, топшириқ берса, бажармайдиган ёки бажаролмайдиган раҳбарлар, шунингдек қоматини кўз-кўз қиладиган аёл бор», дея муносабат билдирган.
«Дарё» журналисти билан мулоқотда бўлган Файзулла Юсупов мазкур аудиоёзув 2021 йилдаги йиғилишида ёзиб олинганини, бу учун ўша пайтда жазоланганини, айни кунга келиб овозлар яна бирлаштирилиб, янги аудиоёзув сифатида тарқатилаётганини билдирди.
Овозларни солиштириб кўрсангиз бунга ўзингиз ҳам ишонч ҳосил қиласиз. Бу хатойим учун жазоланганман ва бу хатони такрорламайман, — дейди Файзулла Юсупов.
Изоҳ (0)