Chirchiq shahrida joylashgan “Maxam-Chirchiq” AJ korxonasi ishlab chiqarish sexining sintez kolonnasida 4-oktabr kuni soat 08:30 larda portlash sodir bo‘lgandi. FVV holat yuzasidan qo‘shimcha ma’lumot berdi.
Unda aytilishicha, bosh vazir o‘rinbosari Jo‘rabek Mirzamahmudov, Favqulodda vaziyatlar vaziri Abdulla Qo‘ldoshev, Ichki ishlar vazirining birinchi o‘rinbosari Shuhratjon Sobirov, Toshkent viloyati va Chirchiq shahar hokimliklari, mutasaddi vazirlik va idoralarning mas’ul rahbarlari hamda xodimlari tomonidan zudlik bilan voqea joyiga chiqqan holda chaqnash oqibatlarini bartaraf etish ishlari tashkil etildi.
Chaqnash oqibatida ikki nafar ishchi-xodim yengil turdagi tan jarohati olgan va ularning biri shahar shifoxonasiga yotqizilgan. Chaqnash oqibatida kelib chiqqan yong‘in soat 10:00 da to‘liq bartaraf qilindi.
Chaqnash sabablarini o‘rganish hamda kelgusida bunday holatlarning takrorlanishiga yo‘l qo‘ymaslik yuzasidan zarur chora-tadbirlarni belgilash maqsadida, Vazirlar Mahkamasining tegishli qarori bilan bosh vaziri o‘rinbosari Jo‘rabek Mirzamahmudov rahbarligida hukumat komissiyasi tuzilib, belgilangan o‘rganish ishlari olib borilmoqda.
“O‘zkimyosanoat” e’lon qilgan axborotga ko‘ra, “Maxam-Chirchiq” AJning Ammiak-1 ishlab chiqarish sexi sintez bo‘linmasida qisqa portlash yuz berishi oqibatida sexning sintez kalonnasida yong‘in kelib chiqqandi. Hodisa oqibatida korxonaning boshqa ishlab chiqarish maydonlari hamda aholi yashash punktlariga zarar yetmagan. Shu bilan birga atrof muhitga zararli gazlar tarqalmagan. Bu bo‘yicha barcha xavfsizlik choralari o‘z vaqtida ko‘rilgan.
Viloyat hokimligi hodisaning sabab va oqibatlarini atroflicha baholash mutaxassislar tomonidan alohida tekshiruvni talab qilishi tufayli keyinroq batafsil axborot berilishini ma’lum qilgandi.
Izoh (0)