O‘zbekiston tashqi ishlar vaziri Vladimir Norov 4-oktabr kuni Vengriya Tashqi ishlar va savdo vaziri Peter Siyyarto bilan amaliy uchrashuv o‘tkazdi.
TIV matbuot xizmatining xabar berishicha, vazirlar Shavkat Mirziyoyevning Vengriyaga rasmiy tashrifi doirasidagi muzokaralar dasturi va kun tartibini atroflicha muhokama qildi, ikki davlat o‘rtasidagi munosabatlarning bugungi holati hamda hamkorlikni rivojlantirish istiqbollarini ko‘rib chiqdi.
O‘zbekiston-Vengriya munosabatlari 2021-yilda strategik sheriklik darajasiga ko‘tarilganidan keyin ushbu oliy darajadagi tashrif ikki mamlakat o‘rtasidagi faol va keng qamrovli muloqotning, yetakchilar o‘rtasidagi do‘stona va ishonchli munosabatlarning mantiqiy davomi ekanligi qayd etildi.
Vazirlar tashqi ishlar vazirliklari o‘rtasidagi ikki tomonlama siyosiy maslahatlashuvlarni muntazam ravishda davom ettirish, 2023-yilgacha bo‘lgan vazirliklararo hamkorlik dasturini sifatli mazmun bilan boyitish muhimligi to‘g‘risida kelishib oldi.
Shuningdek, avtomobilsozlik, farmatsevtika, qurilish, qishloq xo‘jaligi, turizm va tomonlarni qiziqtirgan boshqa sohalarda qo‘shma loyihalarni amalga oshirish orqali iqtisodiy diplomatiyani faol rivojlantirish muhimligi ta’kidlandi.
Vazirlar parlamentlararo muloqotni faollashtirish, ta’lim sohasidagi aloqalarni, jumladan, Stipendium Hungaricum dasturi asosida mustahkamlash bo‘yicha takliflarni ko‘rib chiqdi.
Xalqaro va mintaqaviy tashkilotlar, xususan, BMT, YXHT va TDT doirasidagi hamkorlikni chuqurlashtirishga alohida e’tibor qaratildi.
Vengriya tomoni O‘zbekiston va Yevropa Ittifoqi o‘rtasida kengaytirilgan sheriklik va hamkorlik to‘g‘risidagi yangilangan bitimni tez fursatlarda imzolanishida qo‘llab-quvvatlashga tayyorligini tasdiqladi.
Muloqot chog‘ida xalqaro va mintaqaviy siyosatning ayrim jihatlari, xususan, Afg‘onistondagi bugungi vaziyat yuzasidan ham fikr almashilgan.
Izoh (0)