Ronaldu APLda 232 ta o‘yinda erishgan natijani Erling Holand 8 ta uchrashuvda qayd etdi

“Manchester Siti” hujumchisi Erling Holand Premyer Liga 9-turi doirasida “Manchester Yunayted”ga qarshi kechgan bahsda (6:3) het-trik qayd etdi.

Bu norvegiyalik futbolchi faoliyatidagi 15-het-trik bo‘ldi. Holand “Manchester Siti” safida uchta het-trik qayd etgan, 5 ta “Zalsburg”, “Borussiya D” — 4, Norvegiya terma jamoasi — 2 va “Molde” safida bitta.

Erling bu borada Krishtianu Ronalduga tenglashib oldi. Qayd etish kerak, 22 yoshli futbolchi “Siti” safidagi 8 o‘yinda 3 ta het-trik qayd etdi. Ronalduga buning uchun 232 ta o‘yin kerak bo‘lgandi.

APLdagi het-triklar soni bo‘yicha yetakchi Serxio Aguero (12) hisoblanadi. Keyingi o‘rinlardan Alan Shirer (11) va Robbi Fauler (9) joy olgan.

Shuningdek, Holand APLdagi Manchester derbilarida gol urish bo‘yicha Ronalduga yetib oldi. “Manchester Siti” forvardi bu vazifani 64 daqiqa ichida amalga oshirdi. Krishtianu 3 ta gol uchun 11 ta o‘yin sarflagandi.

Manchester derbilaridagi eng yaxshi to‘purar “Manchester Yunayted” sobiq futbolchisi Ueyn Runi hisoblanadi. Uning hisobida 11 ta gol bor.