Роналду АПЛда 232 та ўйинда эришган натижани Эрлинг Ҳоланд 8 та учрашувда қайд этди

«Манчестер Сити» ҳужумчиси Эрлинг Ҳоланд Премер Лига 9-тури доирасида «Манчестер Юнайтед»га қарши кечган баҳсда (6:3) ҳет-трик қайд этди.

Бу норвегиялик футболчи фаолиятидаги 15-ҳет-трик бўлди. Ҳоланд «Манчестер Сити» сафида учта ҳет-трик қайд этган, 5 та «Зальцбург», «Боруссия Д» — 4, Норвегия терма жамоаси — 2 ва «Молде» сафида битта.

Эрлинг бу борада Криштиану Роналдуга тенглашиб олди. Қайд этиш керак, 22 ёшли футболчи «Сити» сафидаги 8 ўйинда 3 та ҳет-трик қайд этди. Роналдуга бунинг учун 232 та ўйин керак бўлганди.

АПЛдаги ҳет-триклар сони бўйича етакчи Серхио Агуэро (12) ҳисобланади. Кейинги ўринлардан Алан Ширер (11) ва Робби Фаулер (9) жой олган.

Шунингдек, Ҳоланд АПЛдаги Манчестер дербиларида гол уриш бўйича Роналдуга етиб олди. «Манчестер Сити» форварди бу вазифани 64 дақиқа ичида амалга оширди. Криштиану 3 та гол учун 11 та ўйин сарфлаганди.

Манчестер дербиларидаги энг яхши тўпурар «Манчестер Юнайтед» собиқ футболчиси Уэйн Руни ҳисобланади. Унинг ҳисобида 11 та гол бор.