Narxlar o‘sishi tezlashdi: O‘zbekistonda inflyatsiya yana 1 foizga qaytdi

O‘zbekistonda sentabr oyida 1 foizlik inflyatsiya qayd etildi. Bu haqda Davlat statistika qo‘mitasi hisobotida qayd etilgan.

Yil boshidan beri inflyatsiya 8,1 foizga yetgan bo‘lsa, yillik hisobda 12,2 foizni tashkil etmoqda.

May oyida narxlar oshishi 1 foizni tashkil qilgan edi. Iyunda esa 0,9 foizlik inflyatsiya kuzatilgan.

Iyul oyida 2022-yil hisobi bo‘yicha ilk bor 0,1 foizlik deflyatsiya (narxlar tushishi) qayd etilgan edi. Avgust oyida narxlar o‘sishni boshlagan va bu sentabrda ham davom etmoqda.

Sentabrda eng ko‘p narx o‘sishi kuzatilgan oziq-ovqat sektorida narxlar avgustga (0,7 foiz) nisbatan 2 barobar ko‘tarilgan — 1,4 foiz.

Nooziq-ovqat mahsulotlar va xizmatlar narxlari oy davomida 0,7 foizga, xizmatlar narxlari esa 0,4 foizga oshdi.

Joriy yilning sentabrida oziq-ovqat mahsulotlari o‘tgan yilning oxiriga nisbatan (10 foiz) narxlar oshishi bo‘yicha yetakchilikni saqlab qoldi va ular narxlarining 2022-yil yanvar—sentabrdagi o‘rtacha oylik o‘sish sur’ati 1,1 foizni tashkil etdi.

Nooziq-ovqat mahsulotlar narxlari ushbu davrda 7,9 foizga oshdi, o‘rtacha oylik o‘sish sur’ati 0,9 foizni tashkil etdi.

Xizmatlar narxlarining o‘sish sur’ati 2022-yilning yanvar—sentabrida 4,8 foizga yetdi va o‘rtacha oylik o‘sish sur’ati 0,5 foizni tashkil etdi.

Avvalroq global inflyatsiya bilan bog‘liq vaziyat qandayligi haqida xabar berilgandi.