O‘zbekiston Transport vazirligida Saudiya Arabistoni haj va umra ishlari vaziri Tavfiq ibn Favzon ar-Rabiya boshchiligidagi delegatsiya a’zolari bilan uchrashuv bo‘lib o‘tdi, deb xabar bermoqda “Dunyo” AA.
Vazirlik ma’lumotiga ko‘ra, muzokaralar davomida Saudiya Arabistoni va O‘zbekiston o‘rtasida transport, xususan, havo transporti sohasida hamkorlikni rivojlantirish, ikki mamlakat o‘rtasida muntazam aviaqatnovlar sonini oshirish va turizm yo‘nalishida aloqalarni kengaytirish masalalari muhokama etildi.
Transport vaziri Ilhom Mahkamov bugungi kunda mamlakatlar o‘rtasida transport sohasidagi aloqalar jadal rivojlanib borayotganini ta’kidlab o‘tdi. Shavkat Mirziyoyevning 17-19-avgust kunlari Saudiya Arabistoniga davlat tashrifi davomida ikki mamlakat transport idoralari tomonidan fuqaro aviatsiya sohasida anglashuv memorandumi imzolangani hamkorlikning yangi bosqichini boshlab berdi. Mazkur tashrif davomida transport, xususan, havo transporti sohasida ikki mamlakat o‘rtasidagi mavjud aloqalarni yanada kengaytirish, shaharlar o‘rtasida muntazam aviareyslarni tashkillashtirish bo‘yicha muhim kelishuvlarga erishildi.
Natijada bugungi kunda Uzbekistan Airways AJ tomonidan Toshkent–Jidda–Toshkent yo‘nalishida haftasiga 7 marotaba aviaqatnovlar bajarilmoqda. Uzbekistan Airways AJga haj va umra safarlari doirasidagi mavjud reyslarda tijoriy yuk tashishni amalga oshirish huquqi taqdim etildi.
Tavfiq ibn Favzon ar-Rabiya Saudiya Arabistoni aviakompaniyalari O‘zbekiston yo‘nalishi bo‘ylab aviareyslar amalga oshirishda qulayliklarni yaratib berishda ko‘mak ko‘rsatilayotgani uchun O‘zbekiston hukumatiga minnatdorlik bildirdi. Ayniqsa, Flynas aviakompaniyasiga O‘zbekiston shaharlariga parvozlar amalga oshirish huquqi berilishi natijasida Jidda–Toshkent–Jidda yo‘nalishida haftasiga 2 marotaba aviareyslar yo‘lga qo‘yilganini ta’kidladi.
Uchrashuvda O‘zbekiston tomonidan erishilgan kelishuvlarni samarali amalga oshirish, davlatlar o‘rtasida keng qamrovli hamkorlikni mustahkamlash maqsadida kelgusida Saudiya Arabistoni aviakompaniyalariga Ziyorat turizmi dasturi doirasida tarixiy shaharlar — Samarqand, Buxoro hamda Urganchga muntazam aviareyslarni yo‘lga qo‘yish taklif etildi.
Muzokaralar yakunida tomonlar yaqin muddatlar ichida yangilangan Havo qatnovi to‘g‘risidagi bitim loyihasini ishlab chiqishni yakunlab, uni imzolashga kelishib oldi.
Izoh (0)