Ўзбекистон ва Саудия Арабистони ҳаво қатнови тўғрисида битим имзолайди

Ўзбекистон Транспорт вазирлигида Саудия Арабистони ҳаж ва умра ишлари вазири Тавфиқ ибн Фавзон ар-Рабия бошчилигидаги делегация аъзолари билан учрашув бўлиб ўтди, деб хабар бермоқда «Дунё» АА.

Вазирлик маълумотига кўра, музокаралар давомида Саудия Арабистони ва Ўзбекистон ўртасида транспорт, хусусан, ҳаво транспорти соҳасида ҳамкорликни ривожлантириш, икки мамлакат ўртасида мунтазам авиақатновлар сонини ошириш ва туризм йўналишида алоқаларни кенгайтириш масалалари муҳокама этилди.

Транспорт вазири Илҳом Маҳкамов бугунги кунда мамлакатлар ўртасида транспорт соҳасидаги алоқалар жадал ривожланиб бораётганини таъкидлаб ўтди. Шавкат Мирзиёевнинг 17-19 август кунлари Саудия Арабистонига давлат ташрифи давомида икки мамлакат транспорт идоралари томонидан фуқаро авиация соҳасида англашув меморандуми имзолангани ҳамкорликнинг янги босқичини бошлаб берди. Мазкур ташриф давомида транспорт, хусусан, ҳаво транспорти соҳасида икки мамлакат ўртасидаги мавжуд алоқаларни янада кенгайтириш, шаҳарлар ўртасида мунтазам авиарейсларни ташкиллаштириш бўйича муҳим келишувларга эришилди.

Натижада бугунги кунда Uzbekistan Airways АЖ томонидан Тошкент–Жидда–Тошкент йўналишида ҳафтасига 7 маротаба авиақатновлар бажарилмоқда. Uzbekistan Airways АЖга ҳаж ва умра сафарлари доирасидаги мавжуд рейсларда тижорий юк ташишни амалга ошириш ҳуқуқи тақдим этилди.

Тавфиқ ибн Фавзон ар-Рабия Саудия Арабистони авиакомпаниялари Ўзбекистон йўналиши бўйлаб авиарейслар амалга оширишда қулайликларни яратиб беришда кўмак кўрсатилаётгани учун Ўзбекистон ҳукуматига миннатдорлик билдирди. Айниқса, Flynas авиакомпаниясига Ўзбекистон шаҳарларига парвозлар амалга ошириш ҳуқуқи берилиши натижасида Жидда–Тошкент–Жидда йўналишида ҳафтасига 2 маротаба авиарейслар йўлга қўйилганини таъкидлади.

Учрашувда Ўзбекистон томонидан эришилган келишувларни самарали амалга ошириш, давлатлар ўртасида кенг қамровли ҳамкорликни мустаҳкамлаш мақсадида келгусида Саудия Арабистони авиакомпанияларига Зиёрат туризми дастури доирасида тарихий шаҳарлар — Самарқанд, Бухоро ҳамда Урганчга мунтазам авиарейсларни йўлга қўйиш таклиф этилди.

Музокаралар якунида томонлар яқин муддатлар ичида янгиланган Ҳаво қатнови тўғрисидаги битим лойиҳасини ишлаб чиқишни якунлаб, уни имзолашга келишиб олди.