30-sentabr kuni krasnodarlik 27 yoshli, Walkie taxallusi bilan tanilgan reper Ivan Petunin o‘z joniga qasd qildi. Uning jasadi ko‘p qavatli bino yonidan topildi, deb yozadi Meduza.
Avvalroq Petunin mobilizatsiya tufayli o‘z joniga qasd qilmoqchi ekanligini Telegram kanalidagi videomurojaat orqali ma’lum qilgan edi.
“Agar siz ushbu videoni tomosha qilayotgan bo‘lsangiz, demak, men endi tirik emasman. Mening qalbimda qotillik yo‘q, men buni qilolmayman va xohlamayman. Men hech qanday sababsiz odam o‘ldirishga tayyor emasman”, — degan Petunin videoda.
U psixonevrologik dispanserda bo‘lgani uchun safarbarlikdan muhlat olganini ham aytgan.
“Ammo menimcha, yaqin kunlarda qisman safarbarlik to‘liq safarbarlikka aylanadi”, — deya qo‘shimcha qilgandi yigit.
O‘limi kuni reper yangi albomini chiqargan. O‘zining videomurojaatida albomdagi va boshqa kompozitsiyalarini tinglashni taklif qilgan.
“Mening qanday odam ekanligimni tushunish uchun ulardan ba’zilarini tinglab ko‘ring”, — degan Petunin.
Izoh (0)