Putin bosib olingan hududlarni Rossiya tarkibiga kiritish to‘g‘risidagi shartnomani imzoladi

Rossiya prezidenti Vladimir Putin Ukrainaning bosib olingan hududlari va o‘zini o‘zi e’lon qilgan Donbass respublikalarining “Rossiya tarkibiga qo‘shilishi” haqidagi kelishuvni imzoladi, deya xabar berdi Meduza.

Rossiya prezidenti Vladimir Putin va o‘zini o‘zi e’lon qilgan Lugansk va Donetsk xalq respublikalari, shuningdek, Zaporojye va Xerson viloyatlari ishg‘ol ma’muriyati rahbarlari Kremlda “Rossiyaga qo‘shilish” to‘g‘risidagi bitimlarni imzoladi. Shuningdek, hujjatlarni mos ravishda Leonid Pasechnik, Denis Pushilin, Yevgeniy Balitskiy va Vladimir Saldolar imzo chekdi.

Hujjatni imzolash marosimidan oldin Putin nutq so‘zlab, xususan, bosib olingan hududlarning “uyga qaytayotganini” ta’kidladi va Qo‘shma Shtatlar ikki marta yadro qurolini qo‘llaganini eslatib o‘tdi. Undan tashqari, u G‘arb davlatlarining dunyoda tinchlik o‘rnatishga bo‘lgan urinishlari faqat o‘zlarining foydasiga ekanini aytdi.

Putinning nutqi Rossiya telekanallari tomonidan jonli efirda namoyish etildi. Parlamentning har ikki palatasi deputatlari, viloyatlar rahbarlari, hukumat a’zolari va prezident ma’muriyati a’zolari yig‘ilgan zal bir necha bor Putinning so‘zlarini gulduros qarsaklar bilan kutib oldi.

“RIA Novosti” xabariga ko‘ra, Checheniston rahbari Ramzan Qodirov Putinning nutqi chog‘ida yig‘lab yubordi.