KXDR Baydenning tashrifidan keyin uchta raketa uchirdi, AQSH va Janubiy Koreya bunga javoban raketa parvozlarini amalga oshirdi

Shimoliy Koreya sharqiy yo‘nalishda noma’lum turdagi ballistik raketa uchirdi, bu KXDR hududidan joriy yil uchirilgan 17-raketa bo‘ldi. Bu haqda Janubiy Koreya Shtab boshliqlari birlashgan qo‘mitasi ma’lum qildi.

Yaponiya mudofaa vazirligi bu axborotni tasdiqlab, raketa dengizga kelib tushganini qo‘shimcha qildi. Keyinroq Shimoliy Koreya yana ikkita raketa uchirdi, Yaponiya qirg‘oq xizmati ma’lumotlariga ko‘ra ular ham dengizga tushgan.

Yaponiya hukumati AQSH prezidenti Jo Baydenning Seul va Tokioga tashrifi hamda QUAD sammiti (Avstraliya, AQSH, Hindiston va Yaponiya ishtirokidagi xavfsizlik bo‘yicha to‘rt tomonlama muloqot)dan keyin darhol amalga oshirilgan raketa parvozlari tufayli KXDRga norozilik bildirdi.

“Bu Shimoliy Koreya tomonidan ochiq-oydin provokatsiyadir. Bu mutlaqo nomaqbul. Biz diplomatik kanallar bo‘yicha norozilik bildirdik”, — dedi Yaponiya mudofaa vaziri Nobuo Kisi.

KXDR uchirgan uchta raketaning ikkitasi 300 va 750 km masofani bosib o‘tib, Yapon dengizining sharqiy qismiga kelib tushgan.

Yonhap agentligi Shtab boshliqlari qo‘mitasiga tayanib yozishicha, Janubiy Koreya harbiylari KXDRning ushbu xatti-harakatlariga javoban, “Xenmu-2” ballistik raketalarini uchirdi, AQSH esa Yapon dengiziga qarata bitta ATACMS snaryadini uchirdi. Shu tariqa ittifoqchilar ittifoq kuchlari tomonidan “zudlik bilan zarba berilishi” imkoniyatlarini ko‘z-ko‘z qilgan.

“Ballistik raketalarning provokatsion uchirilishiga javoban, AQSH va Koreya Respublikasi tomonidan Elephant Walk aviatsiya mashg‘ulotlari o‘tkazildi va ‘yer—yer’ sinfidagi raketalari birgalikda uchirildi”, — deyiladi Janubiy Koreya harbiylari bayonotida.

O‘tgan hafta oxirida Janubiy Koreyaga Amerika prezidenti Jo Bayden tashrif buyurdi. Oq uy razvedka ma’lumotlariga tayanib, Shimoliy Koreya prezidentning tashrifi chog‘ida yoki undan keyin yadro yoki raketa sinovlarini o‘tkazishi mumkinligini taxmin qilgandi. Baydenning milliy xavfsizlik bo‘yicha maslahatchisi Jeyk Sallivan o‘shanda Vashington kutilmagan barcha vaziyatlarga tayyorligini ta’kidlagandi.

Yonhap ma’lumotlariga qaraganda, KXDR raketalarni uchirgan vaqtda AQSH prezidenti Yaponiyani tark etib bo‘lgandi.