Estoniya, Polsha va Bolgariya Tashqi ishlar vazirliklari 27-sentabr kuni o‘z fuqarolaridan Rossiya hududini tark etishni so‘rab bayonotlar tarqatdi.
Estoniya muassasasi o‘z fuqarolarini Rossiyaga safarlarni amalga oshirmaslikka, allaqachon u yerda bo‘lganlarni esa uyga qaytishga chaqirdi. Rossiyada o‘tkazilayotgan safarbarlik fonida Estoniya Tashqi ishlar vazirligi eslatishicha, Moskva qo‘sh fuqaroligi bo‘lgan aholini o‘z fuqarolari deb hisoblamoqda.
O‘z navbatida, Bolgariya diplomatlari Rossiyada “vaziyat murakkablashayotgani”ni ma’lum qilib, fuqarolarni bu mamlakatni tark etishga chaqirdi. U yerda qolishga qaror qilganlardan esa “ogohlikni oshirishni, odamlar to‘planadigan joylardan uzoq bo‘lishni, vaziyatning qanday rivojlanishini hisobga olishni” so‘radi.
Polsha TIV esa Rossiyadagi polshaliklarga ularning mamlakati Moskva tomonidan “do‘st bo‘lmagan” davlat deb tan olinganini eslatdi. Shuningdek, tajovuzkor mamlakat hududida Polsha bank kartalaridan foydalanib bo‘lmasligi, u yerda o‘zboshimchalik bilan hibsga olishlar keng tarqalgani, mobil telefonlar esa majburiy tekshirilishi aytildi.
Bundan tashqari, Varshava qayd etishicha, qo‘sh fuqaroligi bo‘lganlarga Rossiyadan chiqish cheklanishi mumkin, chegaralar yopilgan yoki favqulodda vaziyatlar yuzaga kelgan taqdirda esa Rossiyada Polsha diplomatik xodimlari juda kamligi sababli, polshaliklarni evakuatsiya qilish mumkin bo‘lmay qolishi ehtimoli bor.
Izoh (0)