АҚШ Украинага 1,1 миллиард долларлик янги ҳарбий ёрдам пакетини тақдим этишга тайёрланмоқда. Бу ҳақда Америка раҳбариятидаги манбага таяниб, Reuters хабар берди.
Бу ёрдам Херсон ва Запорожье вилоятларида, шунингдек, Донецк ва Луганск халқ республикаларида бўлиб ўтган Россияга қўшилиш бўйича референдумларга жавоб бўлади. Янги пакет яқин кунларда эълон қилинади, деди исмини ошкор қилмаслик шарти билан манба.
Манбага кўра, тўпламга янги HIMARS баравар ўт очувчи реактив тизимлар, ўқ-дорилар, жанговар дронлардан мудофаа тизими, шунингдек, техник ёрдам воситалари киради.
Бундан ташқари, манбанинг таъкидлашича, АҚШ референдумлар натижалари эълон қилинганидан кейин Россияга қарши қўллаш учун янги санкциялар пакетини тайёрламоқда.
Аввалроқ АҚШ Давлат котиби Энтони Блинкен референдумлар ҳарбий ҳаракатларни тўхтатиш учун асос бўлмаслигини айтган эди. Вашингтон Украина йўқотилган ҳудуд устидан назоратни қайта тиклаши учун Киевни қурол-яроғ билан таъминлашда давом этмоқчи.
23—27 сентябрь кунлари ДХР, ЛХР, Херсон ва Запорожье вилоятларида Россияга қўшилиш бўйича референдумлар бўлиб ўтди. Тўрт вилоятда ҳам сайловчиларнинг иштироки 50 фоиздан ошган. Сайлов бюллетенлари 100 фоиз қайта саналганидан сўнг, Россияга қўшилиш ЛХРда 98,4 фоиз, Херсон вилоятида 87 фоиз, Запорожье вилоятида 93,1 фоиз, ДХРда эса 99,23 фоиз иштирокчи томонидан қўллаб-қувватлангани айтилмоқда.
Изоҳ (0)