Bo‘stonliqda erkak va ayolning oldidan qalbaki so‘m kupyuralari topildi
Toshkent viloyati Bo‘stonliq tumanida qalbaki pullarning muomalaga kiritilishi oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Bo‘stonliq tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda fuqarolar M.A. va Y.M. foydalanuvida bo‘lgan Lacetti avtotransport vositasi saloni ko‘zdan kechirilgan. Natijada 52 dona 100 ming so‘mlik, 19 dona 50 ming so‘mlik va 11 dona 200 ming so‘mlik qalbaki kupyuralar borligi aniqlanib, ashyoviy dalil sifatida olingan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
