24-sentabr kuni investitsiyalar va tashqi savdo vaziri Jamshid Xo‘jayev rahbarligida konferensaloqa vositasida importni optimallashtirish hamda tarmoqlararo va hududlararo sanoat kooperatsiyasini rivojlantirish masalalariga bag‘ishlangan yig‘ilish bo‘lib o‘tdi. Bu haqda ITSV axborot xizmati xabar qildi.
Qayd etilishicha, yig‘ilishda vazirliklar va idoralar, tarmoq birlashmalari hamda Qoraqalpog‘iston, viloyatlar va Toshkent shahar mahalliy hokimlik organlarining rahbarlari ishtirok etgan.
Tasdiqlangan dasturga muvofiq, joriy yilning o‘tgan davrida mahalliylashtirish dasturi doirasida 24,3 trillion so‘mlik import o‘rnini bosuvchi mahsulotlar ishlab chiqarilgan. Elektron kooperatsiya portali orqali 7,9 trillion so‘mlik 36,6 mingta hamkorlik shartnomalari imzolangan. Ular doirasida bugungi kunda 3,7 trillion so‘mlik mahsulot to‘liq yetkazib berilgan.
Qoraqalpog‘iston Respublikasi, Jizzax, Sirdaryo, Samarqand, Surxondaryo, Namangan, Farg‘ona, Andijon va Xorazm viloyatlarida o‘tkazilgan hududiy tarmoqlararo sanoat yarmarkalari davomida 2,8 trillion so‘mlik 6,3 mingta shartnoma va 220 ga yaqin texnik hamkorlik memorandumlari imzolangan.
Shuningdek, mahalliylashtirish dasturini amalga oshirish, mamlakatda analoglari ishlab chiqarilayotgan mahsulotlar importini kamaytirish, elektron kooperatsiya portali orqali tuzilgan shartnomalar shartlarini bajarish, yirik sanoat korxonalarida importga bog‘liqlik darajasini pasaytirish bilan bog‘liq dolzarb masalalar konstruktiv tarzda muhokama qilingan.
Tarmoq birlashmalari va mahalliy hokimiyat organlarining mas’ul rahbarlari yuqoridagi barcha yo‘nalishlar doirasida amalga oshirilgan ishlar hamda yaqin va o‘rta muddatli istiqboldagi rejalari to‘g‘risida batafsil hisobotlarni taqdim etgan. Ularga kamchiliklarni bartaraf etish va o‘z vaqtida mahalliylashtirish dasturini amalga oshirish, 2023—2024-yillarda tarmoqlar va hududlar kesimida import o‘rnini bosuvchi mahsulotlarning yangi turlarini ishlab chiqarishni nazarda tutuvchi mahalliylashtirish dasturini ishlab chiqish bo‘yicha topshiriqlar berilgan.
Alohida tartibda joriy yilning noyabr oyida Toshkent shahrida Respublika tarmoqlararo sanoat yarmarkasini tashkil etish masalasi ko‘rib chiqilgan.
Yig‘ilish yakunida tegishli rahbarlarga vazifalarni o‘z vaqtida bajarish bo‘yicha qo‘shimcha topshiriqlar berilgan.
Izoh (0)