Тошкент шаҳри, Жиззах, Бухоро вилоятларида ер майдонлари савдоси билан боғлиқ фирибгарлик ҳолатлари фош этилди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департамент ҳамда ДХХнинг Жиззах вилояти бошқармалари томонидан тезкор тадбир ўтказилган. Унда фуқаро Т.Х. фуқаро Ж.га Шароф Рашидов тумани ҳудудидаги яқин қариндошларига томорқа учун ажратилган 40 сотих ер майдонини ҳамда ушбу ҳудудга туташ захирадаги 60 сотих ер майдонини расмийлаштириб олиб бериш эвазига 110 миллион сўмни олган вақтида ашёвий далиллар билан ушланган.
Яшнобод туман бўлими томонидан ўтказилган тезкор тадбирда «Ўздаверлойиҳа» давлат илмий лойиҳалаш институти «Тошвилерлойиҳа» бўлинмаси муҳандиси Ш.Ш. фуқаро I.У. билан олдиндан ўзаро тил бириктириб, фуқаро У.га Зангиота туманида 8 сотих ер майдонини 22 000 долларга сотишга келишгани аниқланган. Улар танишлари орқали ҳужжатларини расмийлаштириб бериши эвазига олдиндан 2 000 доллар олган вақтида ашёвий далиллар билан ушланган.
Шунингдек, Олот туман бўлими томонидан ИИБ ходимлари билан ҳамкорликда тезкор тадбир ўтказилган. Унда фуқаро Ў.Ҳ. фуқаро Н.га юқори лавозимда ишловчи танишлари ёрдамида Когон тумани ҳудудидан захирадаги 8 сотих ер майдонини расмийлаштириб олиб бериш эвазига 9 500 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)