O‘zbekiston va Qirg‘iziston o‘rtasidagi chegaraning aniqlashtirilmagan qismi bo‘yicha shartnomalar loyihalari tez orada ikkala mamlakat prezidentlari tomonidan imzolash uchun tayyorlanadi. Bu haqda Qirg‘iziston Davlat milliy xavfsizlik qo‘mitasi raisi va Vazirlar mahkamasi raisi o‘rinbosari Qamchibek Tashiyev ikki mamlakat hukumatlari delagatsiyalarining qirg‘iz-o‘zbek davlat chegarasini delimitatsiya va demarkatsiya qilish masalalari bo‘yicha qo‘shma majlisida ma’lum qildi.
“Biz va sizga tarixiy ahamiyatga ega vazifa — qirg‘iz-o‘zbek davlat chegarasini delimitatsiya va demarkatsiya qilish masalasini yakunlash yuklatildi. Bu bir tomondan katta sharaf bo‘lsa, ikkinchi tomondan kuchli mas’uliyatdir”, — dedi u.
Qirg‘iziston Davlat milliy xavfsizlik qo‘mitasi raisi ikki mamlakatni yaqin qo‘shnilar, chin do‘stlar va strategik sheriklar deb atadi.
“Qirg‘iziston O‘zbekiston bilan siyosiy, savdo-iqtisodiy, investitsiyaviy, transport, mintaqalararo va madaniy-gumanitar aloqalarni yanada kengaytirish niyatida”, — dedi Tashiyev.
Delegatsiyalar qo‘shma majlis bayonnomasini imzoladi. Ushbu hujjat mamlakatlar o‘rtasidagi chegaraning alohida qismlari haqida yangi kelishuv loyihasini muvofiqlashtirishni boshlash imkonini beradi.
Avvalroq O‘zbekiston va Qirg‘iziston chegara bo‘yicha barcha masalalarni yil oxirigacha yakunlashni rejalashtirayotgani xabar berilgandi.
Ma’lumot uchun, O‘zbekiston va Qirg‘iziston o‘rtasidagi chegara uzunligi 1378 kilometr bo‘lib, uning 85 foizi aniqlashtirilgan.
Mavzuga doir:
- O‘zbekiston—Qozog‘iston davlat chegarasini demarkatsiya qilish to‘g‘risidagi shartnoma loyihasi bo‘yicha kelishuvga erishildi
- O‘zbekiston va Qirg‘iziston chegara demarkatsiyasi bo‘yicha hujjatlar loyihalarini ishlab chiqdi
- O‘zbekiston va Qirg‘iziston maxsus xizmatlari rahbarlari vertolyotda qirg‘iz—o‘zbek chegarasining belgilanmagan qismini ko‘zdan kechirdi
Izoh (0)