Amerikaning jamoatchilik fikrini o‘rganish bo‘yicha Gallup instituti dunyoning 122 ta mamlakati fuqarolari orasida so‘rov o‘tkazib, Global hissiyotlar hisobotini (Gallup Global Emotions Report) e’lon qildi. Unga ko‘ra, eng salbiy hissiyotlar bo‘yicha Afg‘oniston yetakchilik qilmoqda.
Tadqiqotchilar qariyb 127 ming respondentdan bir kun avvalgi ijobiy va salbiy taassurotlari haqida intervyu olgan. Chunonchi, ijobiy taassurotlar haqidagi savollar “Yaxshi dam oldingizmi?”, “Sizga hurmat bilan munosabatda bo‘lishdimi?”, “Ko‘p tabassum qildingizmi yoki kuldingizmi?”, “Biron qiziqarli narsani bilib oldingizmi yoki qiziqarli mashg‘ulot bilan shug‘ullandingizmi?”, “Quvonch tuyg‘usini his qildingizmi?” kabilardan iborat bo‘lsa, salbiy taassurotlar haqidagilari esa og‘riq, xavotir, g‘am-qayg‘u, stress va jahl tuyg‘ulari haqida bo‘ldi.
Ta’kidlash joiz, aynan stress tuyg‘usi ko‘rsatkichi bo‘yicha O‘zbekiston oxirgi o‘rinda joylashdi. “Stress his qildingizmi?” — degan savolga respondentlarning 12 foizigina ”Ha” deb javob bergan.
Ijobiy taassurotlar ko‘rsatkichi (Positive Experience Index)
Umumiy ijobiy taassurotlar ko‘rsatkichi bir necha yillik barqarorlik (100 dan 71 ball)dan keyin 69 ga tushib qoldi. Ko‘pchilik odamlar ularga hurmat bilan munosabatda bo‘lishganini his qilgan (86 foiz), biroq 50 foizigina qandaydir yangi narsa o‘rgangani yoki qilganini aytgan. Odamlar unchalik yaxshi dam olmagan va kamroq xursandchilik his qilgan, biroq ko‘proq kulgan yoki tabassum qilgan.
Ijobiy hissiyotlar darajasi eng yuqori bo‘lgan mamlakatlar o‘nligini Panama (100 dan 85), Indoneziya (84), Paragvay (84), Salvador (82), Gonduras (82), Nikaragua (82), Islandiya (81), Filippin (81), Senegal (81) va Daniya (80) tashkil qildi.
Reytingning eng pastki o‘rinlarini esa Afg‘oniston (32), Livan (37), Turkiya (42), Misr (52), Nepal (53), Tunis (57), Iordaniya (58), Bangladesh (58), Jazoir (58) va Ukraina (60) band etdi.
Umumiy ko‘rsatkichlar bo‘yicha O‘zbekiston o‘ntalikka kirmagan bo‘lsa-da, ba’zi alohida ko‘satkichlar bo‘yicha yuqori o‘rinlarni egalladi. Chunonchi, yaxshi dam olganlik hissiyoti darajasiga ko‘ra, O‘zbekiston 4-o‘rinda joylashdi: respondentlarning 84 foizi “Yaxshi dam oldingizmi?” degan savolga, tasdiq javobini bergan. Bundan tashqari, hurmatni his qilish darajasi bo‘yicha O‘zbekiston 8-o‘rinda joylashdi: bunga oid savolga respondentlarning 96 foizi ijobiy javob bergan.
Salbiy taassurotlar ko‘rsatkichi (Negative Emotions Index)
Xavotir (42%), stress (41%), jismoniy og‘riq (31%), qayg‘u (28%) darajasiga ko‘ra, 2021-yil ushbu indeks tarixidagi eng qiyin yilga aylangan.
Salbiy hissiyotlar darajasi eng yuqori bo‘lgan mamlakatlar o‘nligini Afg‘oniston (59), Livan (58), Iroq (51), Syerra-Leone (50), Iordaniya (48), Turkiya (46), Bangladesh (45), Ekvador (45), Gvineya (45) va Benin (44) tashkil qildi.
Salbiy taassurotlar ko‘rsatkichi eng kam bo‘lgan mamlakatlar qatoriga esa Qozog‘iston (14), Tayvan (16), Kosovo (17), Mavritaniya (18), Singapur (19), Mo‘g‘uliston (19), Malayziya (19), Litva (19), Janubiy Afrika (20) va Latviya (20) kirdi.
O‘zbekistonning salbiy hissiyotlar bo‘yicha ko‘rsatkichiga kelsak, umumiy reytingda o‘ntalikka kirmagan bo‘lsa-da, aynan stress darajasi bo‘yicha Qozog‘iston bilan birga 1-o‘rinda (12), xavotir ko‘rsatkichi bo‘yicha 5-o‘rinda joylashdi.
Hissiyotlar darajalari rang bilan ifodalangan xaritaga ko‘ra, O‘zbekiston va umuman, Markaziy Osiyo mamlakatlari ijobiy hissiyotlar ko‘rsatkichi yuqori va aksincha, salbiy hissiyotlar darajasi past bo‘lgan davlatlar bo‘lib chiqdi.
Izoh (0)