Ўзбекистон ва Қирғизистон ўртасидаги чегаранинг аниқлаштирилмаган қисми бўйича шартномалар лойиҳалари тез орада иккала мамлакат президентлари томонидан имзолаш учун тайёрланади. Бу ҳақда Қирғизистон Давлат миллий хавфсизлик қўмитаси раиси ва Вазирлар маҳкамаси раиси ўринбосари Қамчибек Ташиев икки мамлакат ҳукуматлари делагацияларининг қирғиз-ўзбек давлат чегарасини делимитация ва демаркация қилиш масалалари бўйича қўшма мажлисида маълум қилди.
«Биз ва сизга тарихий аҳамиятга эга вазифа — қирғиз-ўзбек давлат чегарасини делимитация ва демаркация қилиш масаласини якунлаш юклатилди. Бу бир томондан катта шараф бўлса, иккинчи томондан кучли масъулиятдир», — деди у.
Қирғизистон Давлат миллий хавфсизлик қўмитаси раиси икки мамлакатни яқин қўшнилар, чин дўстлар ва стратегик шериклар деб атади.
«Қирғизистон Ўзбекистон билан сиёсий, савдо-иқтисодий, инвестициявий, транспорт, минтақалараро ва маданий-гуманитар алоқаларни янада кенгайтириш ниятида», — деди Ташиев.
Делегациялар қўшма мажлис баённомасини имзолади. Ушбу ҳужжат мамлакатлар ўртасидаги чегаранинг алоҳида қисмлари ҳақида янги келишув лойиҳасини мувофиқлаштиришни бошлаш имконини беради.
Аввалроқ Ўзбекистон ва Қирғизистон чегара бўйича барча масалаларни йил охиригача якунлашни режалаштираётгани хабар берилганди.
Маълумот учун, Ўзбекистон ва Қирғизистон ўртасидаги чегара узунлиги 1378 километр бўлиб, унинг 85 фоизи аниқлаштирилган.
Мавзуга доир:
- Ўзбекистон—Қозоғистон давлат чегарасини демаркация қилиш тўғрисидаги шартнома лойиҳаси бўйича келишувга эришилди
- Ўзбекистон ва Қирғизистон чегара демаркацияси бўйича ҳужжатлар лойиҳаларини ишлаб чиқди
- Ўзбекистон ва Қирғизистон махсус хизматлари раҳбарлари вертолётда қирғиз—ўзбек чегарасининг белгиланмаган қисмини кўздан кечирди
Изоҳ (0)