Italiyaning Milan shahridan Neapol shahriga uchayotgan yo‘lovchi samolyotini yashin urdi. Havo kemasining qanotiga ziyon yetdi, deb xabar bermoqda Il Messagero nashri.
Yashin urishi tufayli, bortida 90 kishi bo‘lgan samolyot Bari shahar aeroportiga qo‘nishga majbur bo‘ldi. Ta’kidlanishicha, bortda yuzaga kelgan sarosimaga qaramasdan, yo‘lovchilarning hech biri jabrlanmagan.
Samolyot qo‘nganidan keyin, odamlar Neapolga yer usti transporti orqali yetkazilgan.
Ushbu havo kemasi EasyJet kompaniyasiga tegishli bo‘lgani aytilmoqda.
Samolyotni yashin urishi qanchalik xavfli?
Statistika ma’lumotlariga ko‘ra, o‘rtacha olganda, har bitta tijorat samolyotiga bir yilda bir marta yashin urishi to‘g‘ri keladi. Uchuvchilar har uch ming soat parvoz chog‘ida bir marta yashin zarbasiga duch kelishi mumkin.Yashin urishi yo‘lovchilar va samolyotlar uchun deyarli xavfli emas. Yo‘lovchilar ishonchli darajada himoyalangan, chunki samolyot elektr tokini yaxshi o‘tkazadigan alyuminiydan yasalgan deyarli mukammal Faradey qafasidir (ushbu qafas elektr tokini erkin o‘tkazadigan yopiq qobiqdan iborat bo‘lib, tashqi elektr zaryadi qafasning yuzasidan “o‘tadi” va ichkaridagi narsalarga ta’sir qilmaydi).
Samolyotga yetadigan zarar yashin qayerga urilib, qayerdan “chiqib ketishi”ga, shuningdek, uning quvvatiga bog‘liq. Odatda yashin samolyot burni, dvigatellarning old qismi, qanot uchlari va gorizaontal stabilizator yaqiniga kelib uradi va qaytib ketadi.
Izoh (0)