Италиянинг Милан шаҳридан Неапол шаҳрига учаётган йўловчи самолётини яшин урди. Ҳаво кемасининг қанотига зиён етди, деб хабар бермоқда Il Messagero нашри.
Яшин уриши туфайли, бортида 90 киши бўлган самолёт Бари шаҳар аэропортига қўнишга мажбур бўлди. Таъкидланишича, бортда юзага келган саросимага қарамасдан, йўловчиларнинг ҳеч бири жабрланмаган.
Самолёт қўнганидан кейин, одамлар Неаполга ер усти транспорти орқали етказилган.
Ушбу ҳаво кемаси EasyJet компаниясига тегишли бўлгани айтилмоқда.
Самолётни яшин уриши қанчалик хавфли?
Статистика маълумотларига кўра, ўртача олганда, ҳар битта тижорат самолётига бир йилда бир марта яшин уриши тўғри келади. Учувчилар ҳар уч минг соат парвоз чоғида бир марта яшин зарбасига дуч келиши мумкин.Яшин уриши йўловчилар ва самолётлар учун деярли хавфли эмас. Йўловчилар ишончли даражада ҳимояланган, чунки самолёт электр токини яхши ўтказадиган алюминийдан ясалган деярли мукаммал Фарадей қафасидир (ушбу қафас электр токини эркин ўтказадиган ёпиқ қобиқдан иборат бўлиб, ташқи электр заряди қафаснинг юзасидан «ўтади» ва ичкаридаги нарсаларга таъсир қилмайди).
Самолётга етадиган зарар яшин қаерга урилиб, қаердан «чиқиб кетиши»га, шунингдек, унинг қувватига боғлиқ. Одатда яшин самолёт бурни, двигателларнинг олд қисми, қанот учлари ва горизаонтал стабилизатор яқинига келиб уради ва қайтиб кетади.
Изоҳ (0)