Qirg‘iziston va Tojikiston o‘z chegaralarida vaziyatni tartibga solish haqida protokol imzoladi. Bu haqda Qirg‘iziston Davlat milliy xavfsizlik qo‘mitasi rahbari Qamchibek Tashiyev ma’lum qildi, deb yozadi “Kabar” agentligi.
Tomonlar uchrashuvi 25-sentabr kuni “Kizil-Bel” nazorat-o‘tkazish punktida bo‘lib o‘tdi. Qirg‘iziston va Tojikiston Davlat milliy xavfsizlik qo‘mitalari rahbarlari Qamchibek Tashiyev va Saymo‘min Yatimov tegishli hujjatni imzoladi.
“Hujjatning asosiy maqsadi — chegaradagi so‘nggi nizoni hal qilish, uning oqibatlarini bartaraf etish va yangi ziddiyatlarga yo‘l qo‘ymaslik”, — dedi Tashiyev.
Mahalliy o‘zini o‘zi boshqaruv organlariga va kuch tuzilmalariga tegishli topshiriqlar berildi. “Ularning bajarilishini shaxsan nazorat qilamiz”, — deya ta’kidladi Qirg‘iziston MDXQ rahbari.
14-sentabr kuni Qirg‘iziston va Tojikiston o‘rtasidagi munosabatlar keskinlashgan edi. Davlatlar bir-birini o‘t ochishni to‘xtatish rejimini buzganlikda ayblagan va chegara qishloqlari bir necha kun o‘qqa tutilgan.
19-sentabr kuni kechqurun Qirg‘iziston va Tojikiston chegaradagi vaziyatni barqarorlashtirish va ikki davlat o‘rtasida tinchlik o‘rnatish to‘g‘risida protokol imzoladi. Biroq 21-sentabr kuni Tojikiston Qirg‘iziston chegarada provokatsiyalarni amalga oshirayotganini ma’lum qildi.
Nizo oqibatida Qirg‘izistonning 59 nafar fuqarosi halok bo‘ldi, yana 140 kishi jarohatlar oldi. Tojiksitonning talafoti 41 kishiga yetdi.
Mavzuga doir:
- “Men avvalgilar kabi xiyonatkor emasman” — Sadir Japarov chegara masalasini hal qilish uchun yerdan voz kechmasligini aytdi
- Sadir Japarov BMT minbaridan turib Emomali Rahmon o‘zi rozi bo‘lgan tamoyillardan og‘ayotganini ma’lum qildi
- Qirg‘iziston Tojikiston bilan to‘qnashuvda 500 ta bino vayron bo‘lganini ma’lum qildi
Izoh (0)